Сунтаардар Ильмень күөлгэ көрдүүр-чинчийэр экспедицияҕа сылдьаллар

Ааспыт нэдиэлэҕэ Сунтаардааҕы гимназия уонна лицей үөрэнээччилэрэ айаҥҥа турунан Старай Русса оройуонугар тиийдилэр. Кинилэр Аҕа дойду сэриитигэр охтубут буойуттар кырамталарын көрдүүр-чинчийэр экспедицияҕа кыттыыны ылаллар.

Новгородскай уобалас этэрээтин кытта кыттыһан, биэс оҕо уонна икки салайааччы Ильмень күөл тула лааҕырданнылар. Олорор миэстэлэрин оҥостон, номнуо күрдьэх тутуурдаах, тимири көрдүүр оборудованиелаах көрдүүр-хаһар үлэтигэр туруннулар. Кинилэр маннык экспедицияҕа иккис сырыылара.

Санатан этэр буоллахха, 19-с хайыһар биригээдэтин састаабыгар 597 саха буойуна сүүмэрдэнэн улахан сиэртибэлээх дьайыыга кыттыбыттара. Кыргыһыыга охтубут саллааттар кырамталара күн бүгүҥҥэ диэри үгүстэрэ булулла иликтэр. Онон олус наадалаах, көдьүүстээх үлэҕэ туруммут экспедиция оҕолоругар ситиһиилэри баҕарабыт.

«Сунтаар улууһа» МТ пресс-сулууспата