Суол кытыытыгар эһэ оҕотун буллулар

Томпо улууһугар айан суолун кытыытыгар ийэтэ суох сылдьар эһэ оҕотун көрбүттэр. Айылҕа харыстабылын министиэристибэтэ иһитиннэрбитинэн,   булт хаһаайыстыбатын департаменын ылыммыт  быһаарыытынан, Томпоҕо көстүбүт эһэ оҕотун тутар буолбуттар.

Эһэ оҕотун тутаары Дьокуускайтан уопуттаах булчуттар биригээдэлэрэ айаҥҥа туруммут. Ити кэннэ эһэ оҕотун бэтэринээрдэр көрүөхтэрэ. Ол кэнниттэн  доруобуйата этэҥҥэ буоллаҕына, тыаҕа ыытар туһунан эбэтэр быстах кэмҥэ чөлүгэр түһүөр диэри пууҥҥа тутар туһунан быһаарыныыны ылыныахтара.