Суола сэлиэнньэтигэр саҥа фельдшерскэй-акушерскай пуун аһылынна

 Мэҥэ Хаҥалас улууһун Мэлдьэхси нэһилиэгин Суола сэлиэнньэтигэр саҥа фельдшерскэй-акушерскай пуун (ФАП) дьиэтэ аһылынна.

Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр. Эбийиэк дойду Бэрэсидьиэнэ  Владимир Путин көҕүлээбит «Доруобуйа харыстабыла» национальнай бырайыак чэрчитинэн тутулунна. ФАП иэнэ 75 квадратнай миэтэрэ. Тэрилтэ симиэнэҕэ 10 ыарыһаҕы батарыан сөп.

«Саҥа ФАП  каадырынан толору хааччыллыылаах уонна мэдиссиинэ аныгы стандартыгар толору эппиэттиир. Билигин тыа сиригэр нэһилиэнньэҕэ хаачыстыбалаах мэдииссиинэ көмөтүн оҥорор бары усулуобуйа тэрилиннэ»,-диэн Мэҥэ Хаҥалас улууһун киин балыыһатын кылаабынай бырааһа Алексей Павлов бэлиэтээтэ.

Санатан эттэххэ, кэнники биэс сылга Саха сирин ыраах сытар уонна уустук суоллаах нэһилиэнньэлээх пууннарыгар 80 ФАП уонна врачебнай амбулаториялар тутуллубуттара. 2024 сыл бүтүөр диэри Саха сиригэр  уон саҥа мэдииссиинэ пууна тутуллан үлэҕэ киириэҕэ. Эбийиэктэр бары аныгы мэдиссиинэ оборудованиеларынан хааччыллыылаахтар.