Сүрүн ыйытыы — дойдуларыттан кэлэр баһыылкалары тарҕатыы

Москва куоракка Кэлим сүрүннүүр киин “быһа лиинийэтэ” аһыллан үлэлиэҕиттэн, икки нэдиэлэ устата байыаннай сулууспалаахтартан 120 ыйытыы киирдэ.

Эдэр дьон ордук аймахтара кинилэргэ ыыппыт суруктарын уонна баһыылкаларын тиэрдии туһунан ыйыттылар.

«Алтынньы ортотуттан биһиги байыаннай сулууспалаахтары кытта сибээстэһэр “быһа лиинийэни“ олохтообуппут», – диэн бэлиэтээбитэ Ил Дархан Айсен Николаев. Ортотунан манна күҥҥэ 5-6 ыйытыы киирэр. Сүрүн боппуруостар – байыаннайдары  экипировканан, наадалаах малынан-салынан, сэбиргэлинэн хааччыйыы, аймахтары кытта ыкса сибээс. Бу күннэргэ Саха сириттэн байыаннай сулууспалаахтарга таһаҕас тиэрдиитин тэтимирдиини быһаарыахтара.  Алтынньы 20 күнүттэн суукканы эргиччи үлэлиир “быһа  лиинийэ” нүөмэрэ хас биирдии Саха сириттэн быстах кэмҥэ анал байыаннай эпирээсийэҕэ ыҥырыллыбыт киһиэхэ тиэрдиллибит. Боппуруос барыта болҕомтоҕо ылыллар. Кэлим сүрүннүүр киин быһаарыытынан территориальнай тирэх пууннар тэриллэн, байыаннай чаастары уонна госпиталлары кытта ыкса сибээстэһэр сорук турар.