Сытар ыарыһахтарга табыгастаах “Парус” рентген-аппараат

Уус Алдан улууһун Оройуоннааҕы киин балыыһата олунньу бүтүүтэ “Парус” мобильнай рентген-аппарааттаммыта.

Саҥа тэрили “Доруобуйа харыстабылын бастакы сүһүөх звенотун модернизациялааһын” бырагырааманан ылбыттара. Билиҥҥитэ уонтан тахса чинчийии оҥоһулунна.

«Бу аппараат көмөтүнэн ыарыһах балаататыгар киирэн уонна эпэрээссийэ кэмигэр түргэнник чинчийиини ыытар кыахтаммыппытыттан олус үөрэбит. Ити  быраастар үлэлэрин улаханнык чэпчэтэр уонна сүрүнэ диэн, сытар ыарыһахтарга табыгастаах. Рентген-аппараат устубутун бырааска Wi-Fi эбэтэр  флешканан тириэрдиэххэ сөп», — диэн Уус Алдан улууһун Оройуоннааҕы киин балыыһатын  кылаабынай бырааһа Анна Петрова сонунун үллэһиннэ.