Тохсунньу билгэлэрэ

Саха сиригэр будулҕан туманнаах тоһуттар тымныылар үгэннээн турар кэмнэрэ. Бырааһынньыктар түмүктэнэн, тулалыыр айылҕабытын кэтээн, тохсунньу билгэлэрин сыныйан көрүөҕүҥ.

14.01 — саҥа ый үүнэр. Ый саҥата саҕаланар. Эргэ саҥа дьылы көрсүһүү. Бу күн устата хайа эмэ кэмҥэ былытырдаҕына, дьаҥ-дьаһах сыл хайа кэмигэр буолара быһаарыллар.

14.01-20.01 – Таҥха оонньуута. Сүллүүкүннэр ууттан тахсаллар.

19.01 – Кириһиэнньэ. Кириһиэнньэ тымныыта түһэр, Таҥха иһиллээһинэ. Бу күн күннээх тымныы буоллаҕына, сайына кураан. Томороон тымныы олунньу 1 күнүгэр диэри күүһүрэр.

21.01 – соҕурууттан тыалырдаҕына, сайына кураан.

23.01 – кэбиһиилээх от кырыардаҕына, сайына ардахтаах.

24.01 – сис былыт кэллэҕинэ, тохсунньу 31-гэр диэри тымныы мүлүрүйэр.

25.01 – күн көрдөҕүнэ, саас көтөр эрдэ кэлэр. Хаар түстэҕинэ ардахтыыр.

30.01 – ый туолуута.

31.01 – Охонооһойоп. Дьыл оҕуһун биир муоһа тостор, кыһын хонуга аччаан барар. Кыһыҥҥы кэм 188 хонугуттан аҥара 94 хонук ааһар. Бэлэмнээбит отуҥ-маһыҥ аҥара хаалар, оччоҕо кыстыгы этэҥҥэ туоруоҥ.

(Саха төрүт култуурата, II чааһа. Дьокуускай, 1992 с.  кинигэттэн).