Туймаада ыһыаҕар — өрөспүүбүлүкэ инновационнай ситиһиилэрэ

Туймаада ыһыаҕар үгүс быыстапка биир сүрүн сонун былаһааккатынан саҥа сүүрээннэри олоххо киллэрэр «Якутия «Технопарк» тэрилтэ «Саха Инновации—2025» быыстапката буолла.

Түһүлгэҕэ ИТ эйгэтин бырайыактара, биотехнология уонна да атын хайысхалар үлэлэлэрэ көрдөрүүгэ турда. Суолталаах быыстапкаҕа Ил Дархан Айсен Николаев сылдьан, араас сонун бырайыактары көрдө-иһиттэ.

«Быыстапка технология урбаанын өйүүргэ уонна көҕүлүүргэ туһуланар.  Өрөспүүбүлүкэбит баай култууратын уонна үгэһин эрэ буолбакка, интеллектуальнай уонна научнай-техническэй кыаҕа бигэтин көрдөрөр. Бу биһиги тирэхпит уонна кэскилбит«, — диэн бэлиэтээтэ Айсен Николаев.

Ийэ дойду көмүскээччитин сылын чэрчитинэн көрдөрүллүбүт саҥа бырайыактар: Green Energy хампаанньа «Тимир-Ат» электрическэй эндурота, «Саха-Дрон» пилота суох көтөр аппараттара, «Бул» радиоэлектроннай бырайыага, ону тэҥэ волонтедар «Илии сылааһа» уонна пилота суох көтөр аппарааттар ураты эспэнээттэрэ болҕомтону тартылар.

Ыалдьыттар бырайыактар ​​экологическай хайысхаларын бэлиэтээтилэр. Ол курдук, үүнээйиттэн оҥоһуллубут айылҕа косметикатыттан саҕалаан, чэйгэ тиийэ бородууксуйа баар. Өрөспүүбүлүкэ айар эйгэҕэ инники күөҥҥэ сылдьар: информационнай технология, киинэ устуута, куйаар ситимин оонньууларын оҥоруу уо.д.а. 2022 сыллаахха Russian Creative Awards национальнай бириэмийэҕэ тиксэн, өрөспүүбүлүкэ Арассыыйа саамай айар куттаах эрэгийиэнинэн билиниллибитэ.