Туризмы сайыннарар урбаанньыттарга дьоһуннаах өйөбүл

Бу күннэргэ СӨ урбааҥҥа, эргиэҥҥэ уонна туризмҥа министиэристибэтэ «Туризм уонна ыалдьытымсах буолуу индустрията» национальнай бырайыак чэрчитинэн  туризм сайдыытыгар туһуламмыт сайаапкалары көрөн,  араас хайысханан дьарыктанар урбаанньыттарга судаарыстыбаттан тустаах өйөбүл- граннары  тыырда.

«Феликс» ХЭУо субсидияны түҥэтии хамыыһыйатыгар үлэтин хайысхатынан сөбүлэтэн, 784 тыһыынча солкуобайга тигистэ. Тэрилтэ туристарга «Yakutiatripp.ru» Национальнай оператор быһыытынан киэҥник биллэр.

Туризмынан дьарыктанар тэрилтэ салайааччыта Федор Винокуров айанньыттары Саха сирин бэлиэ уонна дойду биллэр сирдэринэн айанныыр өҥөнү оҥорор.

Ол курдук, Хаҥалас Булууһугар, Күрүлүүрүгэр, «Өлүөнэ очуостара» айылҕа пааркатыгар – барыта 30-ча туристическай маршрукка оператордыыр. Саха сиригэр сүрүннээн Амма, Буотама, Сиинэ, Өлүөнэ өрүстэринэн устууну тэрийэр. Дьон өссө кини тэрийэр Владивостокка, Иркутскайга, Байкал күөлүгэр айаннарыгар хото сылдьар.

Тэрилтэ үлэтин туһунан сиһилии «Саха сирэ» хаһыат чэппиэрдээҕи нүөмэригэр ааҕыҥ.