Тускул сэрэтэр: «Бу түүн оҕуруоккутун бүрүйүҥ…»

Бу күннэргэ сир аайы оҕуруот аһын сиэмэтэ ыһыллан, оннун булбут кэмэ. Ол эрээри бүгүн, бэс ыйын 13 күнүгэр,  «Тэтим» араадьыйатыгар бээтинсэҕэ диэри күнү-дьылы анаарыытыгар норуот-синоптига  Тускул оҕуруоччуттары анаан сэрэттэ. 

«Бүгүн уонна сарсын, ол аата бэс ыйын 13-14 күннэригэр, түүн +3-5 кыраадыс түһэн, улахан хаһыҥнаах түүннэр буолуохтара. Онон  оҕуруоккутун эрдэттэн сабан, бүрүйэн, үүнээйилэргитин харыстааҥ. Түүн түөрт кыраадыс бэлиэтэниитэ, оҕуруот аһыгар кутталлаах, тыынар тыыннаахха тымныы буолар кыраадыс. Сарсын уонна өйүүн түүн киин уонна илин эҥэр улуустарга +4-5 кыраадыс,  оттон Бүлүү эҥэр, Саха сирин соҕуруу уонна арҕаа улуустарыгар +3 кыраадыс буолуоҕа», — диэн Тускул эттэ.

Дьокуускай куорат таас дьиэлэригэр биллэ тымныйда. Онон бу нэдиэлэ бүтэһигэр диэри хаһан сылыйарын кэтэһэн көрөр буоллахпыт….