Тустуук Виктор Рассадин Олимпиадаҕа кыттарга бэлэмнэнэр

Дьокуускайга ыытыллыбыт улуу тириэньэр Дмитрий Коркин сырдык кэриэһигэр көҥүл тустууга норуоттар икки ардыларынааҕы турнирга ахсыс төгүлүн чөмпүйүөннээбит Виктор Рассадин иккис Олимпиадатыгар кыттарга бэлэмнэнэрин туһунан ЯСИА-ҕа иһитиннэрбит.

«Маннык турниры көтүтэр табыллыбат. Манна дойдум дьоно, биир дойдулаахтарым үчүгэй тустууну көрүөхтэрин баҕараллар, бу да сырыыга пьедестал үрдүкү үктэлигэр таҕыстым. Бастатан туран, Михаил Пахомовка махтаныам этэ, кини маннык улахан тэрээһини ыыппытыгар. Хамаандабар, быраастарга, аттыбар баар дьоҥҥо махталбын тиэрдэбин. Мин иккис Олимпиадабар бэлэмнэнэбин, олимпийскай мэтээл — мин баҕа санаам», — диэн Виктор Рассадин этэр.

Тустуук этэринэн, кини бу сыл бүтүөр диэри өсөс биир турнирга кыттар былааннаах.