Учуонайдар Улла Йохансен истипиэндьийэтин ылар кыахтаахтар

Аспираннар уонна эдэр учуонайдар хотун бэрэпиэссэр Улла Йохансен анал истипиэндьийэтин ылар кыахтаахтар.

Ол туһунан М.К.Аммосов аатынан ХИФУ инклюзивнай үөрэхтээһин сайдыытыгар Хотугулуу-Илиҥҥи научнай-инновационнай киин дириэктэрэ Пантелеймон Егоров маннык иһитиннэрдэ:

-Хотун бэрэпиэссэр Улла Йохансен -– аан дойду таһымнаах этнолог, 1953 сыллаахха «Орнаментальное искусство якутов» монографияны бэлэмнээбитэ, онтон 2008 сыллаахха Саха Өрөспүүбүлүкэтин социальнай сайдыытыгар кылаатын иһин Саха сирин Парламенын мэтээлинэн наҕараадаламмыта.
Улла Йохансен 2012 сыллаахха DAAD Аһымал пуонда нөҥүө бигэргэппит анал истипиэндьийэтэ Германияҕа бэйэ чинчийэр бырайыагын олоххо киллэрэр уонна култууралар икки ардыларынааҕы коммуникацияҕа уопутурар кыаҕы биэрэр.

Холобур, этнологияҕа эбэтэр социальнай салааҕа, устуоруйа наукаларыгар, төрүт былыргы уопсастыба устуоруйатыгар, социальнай уонна култуурунай географияҕа, тылы, муусуканы үөрэтиигэ чинчийиини ыытар аспираннар уонна эдэр учуонайдар кыттыахтарын сөп.

Истипиэндьийэ төһө өр кэмҥэ бэриллэрэ бырайыагы толорорго төһө бириэмэ наадатыттан тутулуктаах (1-6 ыйга).

Докумуоннары биэрэр уонна куонкуруска кыттар туһунан сиһилии Академическай атастаһыы Германиятааҕы сулууспатын (DAAD) Москватааҕы отделениетын саайтыгар билсиэххэ сөп.

Сайаапкалар алтынньы 26 күнүттэн сэтинньи 30 күнүгэр диэри ылыллаллар. Куонкурус түмүктэрин туһунан куонкурус кыттааччыларыгар быһа холоон 2024 сыл ыам ыйын саҥатыгар биллэриэхтэрэ.