Уһук Илин бастыҥ устудьуоннарыгар саҥа истипиэндьийэ олохтонно

Дойду Бырабыыталыстыбата Уһук Илин федеральнай уокурук, ол иһигэр Саха сирин устудьуоннарыгар адмирал Невельскай аатынан саҥа иситипиэндьийэни бигэргэттэ. Уурааҕы премьер-миниистир Михаил Мишустин илии баттаата.

«Уһук Илин федеральнай уокурук үрдүк үөрэх кыһатын бастыҥ устудьуоннара Г.И. Невельскай аатынан ыйдааҕы истипиэндьийэ ылыахтара. Истипиэндьийэни судаарыстыбаннай уонна судаарыстыбаннай суох үрдүк үөрэх кыһатын устудьуоннара ылыахтарын сөп», — диэн бырабыыталыстыбаҕа быһаардылар.

Ый ахсын 30 тыһыынча солкуобайдаах истипиэндьийэ Уһук Илин федеральнай уокурук үрдүк үөрэх кыһаларын устудьуоннарыгар тустаах биридимиэккэ БКЭ-нэн саамай элбэх баалы ылбыттарга, ону тэҥэ оскуола олимпиадатын призердарыгар ананыаҕа.

Иккис уонна аныгыскы куурустарга истипиэндьийэни оннунан хаалларарга, устудьуон «үчүгэй» уонна «туйгун» сыанаҕа сиэссийэтин түмүктүөхтээх уонна билим кэмпириэнсийэлэрин матырыйаалларыгар үлэлэрэ бэчээттэниэхтээх. Маны таһынан саҥа истипиэндьийэни Бүтүн Арассыыйатааҕы эбэтэр аан дойдутааҕы олимпиадаҕа кыайбыттар, научнай-чинчийэр үлэни толорууга граннары ылбыт устудьуоннар ылыахтара. Истипиэндьийэлэри аныырга устудьуоннары сүмэрдээһининэн үрдүк үөрэх кыһатын учуонайдарын Сэбиэттэрэ үлэлиэхтэрэ.