Уһук Илиҥҥэ сир баайын туһаныы иккис пуорума буолуоҕа

Дьокуускайга икки сыллааҕыта аҥардас макроэрэгийиэн хампаанньаларыттан 200-тэн тахса сэҥээриини ылбыт Уһук Илиҥҥэ сир баайын туһаныы иккис пуорума ыытыллыаҕа. Быйылгы сылга иккис төгүлүн ыытыллар тэрээһин Дьокуускайга ахсынньы 5 күнүгэр былааннанар.

Пуорумҥа Уһук Илин сүрүн бырамыысыланнай хампаанньалара, УИФУо субъектарын баһылыктара, федеральнай уонна эрэгийиэннээҕи ситэриилээх былаас уорганнара, дойду иһинээҕи оҥорон таһаарааччылар, билим, үөрэхтээһин, үп-харчы тэрилтэлэрэ кыттыахтара.

Пуорум аһыллыытын кэнниттэн тэрээһин араас салаалаах 12 сиэксийэҕэ арахсыаҕа. «Геология» блокка «Геология: номох хаттаан тиллиитэ» федеральнай бырайыак бастакы түмүктэрин көрүөхтэрэ. «Чох» уонна «ньиэп, гаас» хайысхаларынан 15-20 сыллаах былааннарын дьүүллэһиэхтэрэ.

Кыһыл көмүһү хостооһун уонна цифровизация, ол иһигэр оҥорон таһаарар эбийиэктэргэ AI киллэрии эмиэ ырытыллыаҕа. Бизнеһи өйүүр миэрэлэри эмиэ дьүүллэһиэхтэрэ, тастан киирииттэн тутулуга суох буоларга уопуттарын атастаһыахтара.

Үгэс быһыытынан, пуорумҥа Роснедр салалтатын, өрөспүүбүлүкэ бырабыыталыстыбатын уонна тэрилтэлэрин икки ардыларыгар сабыылаах үс өрүттээх көрсүһүү ыытыллыаҕа. Сүрүн тиэмэнэн эрэгийиэҥҥэ сир аннын баайын туһаныы уонна геологическай чинчийиини сайыннарыы, ону тэҥэ судаарыстыбаннай-чааһынай бииргэ үлэлээһин буолуоҕа. Түмүккэ, бырамыысыланнай тэрилтэлэр үлэлэрин түмүгүн көрүөхтэрэ уонна сир баайын туһаныыга Бириэмийэ кыайыылаахтара биллиэхтэрэ, диэн иһитиннэрэр Ил Дархан, бырабыыталыстыба пресс-сулууспата.