«Умнас» айан суолун өрөмүөннэнэр учаастагар асфальт ууран саҕалаатылар

«Умнас» эрэгийиэннээҕи айан суолун Дьокуускай куорат кыраныыссатын 11,8 км-н 20-кэ диэри «Куттала суох хаачыстыбалаах суоллар» национальнай бырайыак чэрчитинэн суолу оҥоруу үлэлэрэ ыытыллаллар.

Өрөмүөн үлэтэ кэлэр сылга түмүктэниэҕэ диэн СӨ Автомобильнай суолларын управлениета иһитиннэрэр. Билиҥҥи кэмҥэ суолу оҥорооччулар айан суолун үрүт араҥатын асфаллаан саҕалаатылар. Үлэ кыраапык быһыытынан кэминэн баран иһэр. Барыта 8,2 км айан суолун арҕаһын кэҥэтэн, түөрт балаһа буоларын курдук уларытан оҥороллор.

2024 с. үлэ бүтэрин саҕана магистральнай суолу икки араҥа асфалынан бүрүйүөхтэрэ. Саҥа суол устатын тухары 1000 устуука тыастан харыстыыр экраны туруоруохтара, оптуобус 10 тохтобулун, 11 светофоры, 577 сырдатар тирэҕи, 9,3 тыһыынча миэтирэ тротуары, 10 тыһыынчаттан тахса миэтирэ суол кытыытыгар харгыһы уонна 21,9 тыһыынча миэтирэ киһи суолун хаххалыыр хаймыыны оҥоруохтара.