«Урбаанньыттар уопсастыба кыһалҕатыттан туора турбаттар»

“Биир ньыгыл Арассыыйа” баартыйа эрэгийиэннээҕи пуорумун түмүгүнэн, урбаанньыт Алексей Скобелев бэйэтин санаатын үллэһиннэ.

Кини этэринэн, урбаан эйгэтэ, урбаанньыттар дьоҥҥо көмөлөһөр, уопсастыба сайдарыгар төһүү буолар кыахтаахтар диэн СИА суруйар.

— Биһиги уустук кэмҥэ олоробут, сотору-сотору кириисистэр, араас уустук түгэннэр буолаллар. Маннык кэмҥэ дьон түмсэрэ, биир санааҕа кэлэрэ ордук. Урбаан эйгэтэ туора турбакка, дьоҥҥо көмөлөһөр, уопсастыба сайдарыгар улаан төһүү күүс буолар кыахтаах. Оттон судаарыстыба олохтоохторун уонна урбаанньыттары үөскээбит кыһалҕалары, соруктары быһаарар инновационнай быһаарыыларынан өйүөн сөп, оччоҕо уопсастыба биир ньыгыл буолар, — диэн Алексей Скобелев этэр.

Саха сирин урбаанньыттара, чахчы, уопсастыба олоҕуттан туора турбаттар, араас тэрээһиннэри, бырайыактары тэрийэн ыыталлар. Халаан, баһаар, байыаннай дьайыы буоллун, көмөлөһөр илиилэрин утары ууналлар. Онон биир интэриэстээх, бииргэ үлэлиир, түмсэр буоллахха, өрөспүүбүлүкэни сайыннарарга түмүктээх үлэ баар буолар.