Уругвай этэ атыыланар

Эт хаачыстыбатыттан киһи доруобуйата  улахан тутулуктаах. Ол иһин кэмиттэн кэмигэр чинчийиини ыыталлар.

Хонон турдах аайы араас сурахтар-садьыктар тарҕаналлар. Эт боруобатыгар балтараа тыһыынча анаалыс оҥоһуллубутуттан 180-на микробиологическай ирдэбиллэргэ сөп түбэспэт үһү диэтилэр. Ол курдук, Роспотребнадзор Саха Өрөспүүбүлүкэтигэр управлениета иһитиннэрбитинэн, бу сыл 9 ыйын түмүгүнэн эт бородууксуйатыгар 1511 боруоба ылыллан, чинчийии  оҥоһуллубут. Ол иһигэр көтөр этигэр уонна  бородууктатыгар.

Онуоха лаборатория хонтуруолун чахчытынан микробиологическай көрдөрүүнэн булгуччулаах ирдэбилгэ 12 % , физико-химическэй көрдөрүүнэн — 3 % сөп түбэспэтин быһаарбыттар. Ол эрээри санитарнай-химическэй, паразитологическай уонна радиологическай көрдөбүллэринэн боруобалар этиллибит характеристикаларыгар сөп түбэһэллэр. Ити ылыллыбыт боруобаларга мышьяк, ртуть, сибиниэс, кадмий курдуктары, антибиотиктары уонна радиоактивнай веществолары  булбатахтар. Чинчийии түмүгүн билиһиннэрэн баран, Роспотребнадзор эт бородууксуйатын түбэһиэх сиртэн атыылаһыы кутталлааҕын сэрэтэр. Эт бородууксуйатын анал эргинэр сиртэн атыылаһарга сүбэлиир.

Кистэл буолбатах, Саха сирин маҕаһыыннарыгар кэлии эт  хото атыыланар. Тупсубута Алтай киэнэ буолар. Бэл, Уругвай этэ эмиэ атыыланар эбээт. Аата аҕаллахтара ырааҕын дуу, чугаһын дуу? Хата, маннык тиэллэн кэлэр эттэр хаачыстыбаларын үчүгэй аҕайдык бэрэбиэркэлиэххэ баара. Үнүр биир маҕаһыыҥҥа “Арассыыйа ынаҕын туйаҕа” диэн нобуор баара. Дьэ, булан суруйаллар ээ. Ол да буоллар, алааспытыгар мэччийэр ынахпыт этэ барахсан амтанныын минньигэс буоллаҕа.

Хаартыска: Уругвай этэ