Саха сиригэр «Өлбөт үйэлээх полк» аахсыйа саҕаланна

Бүгүн, ыам ыйын 6 күнүттэн, Саха сиригэр «Өлбөт үйэлээх полк» аахсыйа саҕаланна диэн СӨ Бырабыыталыстыбатын пресс-сулууспата иһитиннэрэр. 

Аҕа дойду Улуу сэриитин дьоруойдарын устуоруйатын Саха сирин киин куоратыгар «Киин» киинэ тыйаатыр, ИТ-паарка уулуссаҕа турар экраннарыгар, ону тэҥэ Дьокуускай куоракка Элбэх өҥөнү оҥорор кииннэригэр (МФЦ) уонна «Саха» НКИХ ханаалларыгар көрүөххэ сөп.

Тэрийээччилэр этэллэринэн, «Өлбөт үйэлээх полк» аахсыйатын маннык саҕалааһын «Саха» көрдөрөр-иһитиннэрэр хампаанньа исписэлиистэрэ бэлэмнээбит видеороликтара буолар.

2015 сылтан, патриотическай бырайыак чэрчитинэн, телеханаал 2 124 Аҕа дойду Улуу сэриитин кыттыылааҕын уонна тыыл үлэһитин туһунан информацияны хомуйбута. Аахсыйа уопсай хронометражнай көрдөрүүтэ 10 чаас 19 мүнүүтэ 30 сөкүүндэ буолуоҕа.

Санатан эттэххэ, быйыл Бүтүн Арассыыйатааҕы «Өлбөт үйэлээх полк» аахсыйаҕа Саха сирин олохтоохторо биэс араас көрүҥүнэн кыттыахтарын сөп. Улуу Кыайыыны уһансыбыт сэрии кыттыылааҕын уонна тыыл бэтэрээнин туһунан бэйэлэрин дьоруой дьоннорун кэриэстиир өйдөбүнньүк хаартыскалары тэрилтэлэр Өйдөбүнньүк эркиннэригэр уонна тус массыыналарыгар туруоруохтарын сөп.

Оскуолаларга бу тэрээһин линейка, оттон Оҕо уһуйааннарыгар «утренник» быһыытынан барыаҕа. Итини сэргэ Дьокуускай куоракка «Өлбөт үйэлээх полк» ураты бэлиэтинэн, Аҕа дойду Улуу сэриитин уонна анал байыаннай дьайыы хаартыскаларынан симэммит массыыналар парааттара буолуо.

Аҕа дойду Улуу сэриитин дьоруойдарын устуоруйатын кэпсиир видеоролик «Киин» киинэ тыйаатыр, ИТ-паарка уулуссаҕа турар экраннарыгар, ону тэҥэ «Саха» НКИХ, «Якутия 24», «Мамонт» ханаалларыгар ыам ыйын 12 күнүгэр диэри көстүөҕэ.