Устуоруйаҕа киирэр  тэрээһиҥҥэ сырыттыбыт

Уус Алдан улууһун бэтэрээннэрэ салайааччыбыт Олег Фёдоров тэрийиитинэн  “Азия оҕолоро” успуорт аан дойдутааҕы  оонньууларын уоттарын көрсө Хаҥалас улууһугар аатырбыт Өлүөнэ очуостарыгар баран үөрэн-көтөн кэллибит.

Айаммыт устатын тухары көнө, киэҥ суолунан оптуобус иһиттэн икки өттүбүтүгэр үрдүк мырааннартан саҕалаан, хаары бүрүнэн саҕынньахтаах дьону санатар очуос хайалары сэргээн көрдүбүт.

Суоппарбыт Михаил Пестерев уопуттаах буолан,  уруулун бэркэ тутар.  Онон, төһө даҕаны ардыгар көлүөһэбит алдьаннар,  бэрт холкутук оҥоро охсон айаммытын салҕаан, аһыллыыны куоттардарбыт даҕаны, элбэх кэрэ өйдөбүллэри ыллыбыт.

Биһигини, бочуоттаах бэтэрээннэри,  босхо аһаран түһүлгэҕэ киллэрдилэр. Саҥа  каток чахчы даҕаны тэлэбиисэргэ көрөр катоктарбытыттан уратыта суоҕун сөхтүбүт. Биллиилээх хоккеистары илэ харахпытынан көрдүбүт. Кинилэр бу кэрэ очуос таас көстүүлэриттэн дуоһуйбут көрүҥнээхтэр. Саха киһитэ аан дойду успуордун  номохторун кытары хоккей курдук сахаҕа саҥа эрээри,  түргэнник киирбит көрүҥҥэ оонньообута дьэ, сонун. Онон биир дойдулаахпыт, оҕо сааһыттан Бороҕоҥҥо каток оҥорон успуорт бу көрүҥүн бастакынан тарҕаппыт Клим Алексеевынан киэн тутуннубут. Муус сыырга сырылааччы элбэх. Баҕалаахтары буран киэргэтиилээх сыарҕанан хатааһылатар. Онтон да атын аттракционнар элбэхтэр. Шашлык, итии чэй, кофе да атыыга баар эрээри, саастаах дьон аспытын хааччынан кэлбит буоламмыт, туспа түһүлгэлэннибит.

Түмүккэ бу курдук кэрэ өйдөбүлү бэлэхтээбит улуус баһылыга Василий Аммосовка,  улуус бэтэрээннэрин сүбэтин бэрэссэдээтэлэ Олег Федоровка,  кураторбыт Анатолий Сторожевка,  оптуобуһунан хааччыйбыт үөрэх управлениетын начаалынньыга Степан Литвинцевкэ махтанан,  күн, сибиэһэй салгын, айылҕа аргыстанан, эдэрдии эрчимнэнэн кэллибит.

Ульяна БУРНАШЕВА