скриншот
Ил Дархан Айсен Николаев кыттыылаах «Быһа лииньийэ» ааспыта биир ый буолла. Ол кэм иһигэр өрөспүүбүлүкэ олохтоохторуттан киирбит ыйытыыларга, көрдөһүүлэргэ үлэ хайдах барара, чопчу түмүктэр дьэҥкэтик көһүннүлэр. Биэрии кэмигэр эрэгийиэн салайааччыта сытыы боппуруостарга хоруйдаабыта уонна бырабыыталыстыбаҕа, тустаах министиэристибэлэргэ хас да сорудаҕы биэрбитэ. Бу үлэ барыта кытаанах хонтуруолга турар.
«Саха сирэ, иннин диэки!» биэриигэ Ил Дархан үлэ хаамыытын туһунан сырдатта. Кини сорох салайааччылар дьон үҥсүүтүгэр, көрдөһүүтүгэр ситэтэ суох сыһыаннаһалларын, кураанах кумааҕынан «куотуна» сатыылларын кытаанахтык кириитикэлээтэ.
«Хомойуох иһин, сорох олохтоох салайыныы уорганнара, былаас бэрэстэбиитэллэрэ кураанах отчуот кэннигэр саһа сатыыллар, суругунан эрэ хоруйдууллар. Бу букатын сатаммат», — диэн Айсен Николаев бэлиэтээтэ.
Ол эрээри, бырабыыталыстыба уонна министиэристибэлэр дьиҥнээхтик үлэлээн, хас да улахан кыһалҕаны миэстэтигэр быһаардылар. Ол курдук, Дьокуускай куоракка Үүнэр көлүөнэ тыйаатырын урукку уопсайыгар олорор дьон 10-тан тахса сыл туруорсубут боппуруостара хамсаата. Ил Дархан сорудаҕынан, хаарбах дьиэттэн сэттэ ыал «Сулустаах» түөлбэҕэ саҥа кыбартыыраларга көстүлэр.
Маны таһынан, сайыҥҥы халаан уутуттан эмсэҕэлээбит Үөһээ Дьааҥы улууһун олохтоохторугар толуйуу харчыта бүтэһиктээхтик төлөннө. Тырааныспар эйгэтигэр эмиэ көрдөрүүлэр бааллар: Өймөкөөн улууһун Уус Ньаратыгар аэропорт үлэтэ чөлүгэр түстэ. Урукку өттүгэр манна көтөр-түһэр балаһа өрөмүөнэ уһаан, дьон эрэйдэнэр этэ. Билигин көтөр ааллар болдьохторугар сөпкө, кэмигэр көтөр буоллулар.
Өрөспүүбүлүкэ олохтоохторуттан киирбит атын да сайаапкаларынан үлэ салҕанар.
Анна Слепцова, Дьокуускай куорат олохтооҕо:
«Айсен Сергеевич «Быһа лииньийэҕэ» тахсан, Үүнэр көлүөнэ тыйаатырын урукку уопсайыгар олорбут олоохтор кыһалҕаларын таарыйбытыгар, дьэ дьиҥнээх үлэ тутатына саҕаламмыта. Ил Дархан эппитин курдук, кураанах отчуот эрэ буолбакка, дьиҥнээх үлэ ыытылынна. Билигин «Сулустаах» түөлбэҕэ сап-саҥа, сылаас, сырдык кыбартыыраларга көһөн киирдилэр. Үөрүүлэрэ муҥура суох. Ил Дархаҥҥа уонна дьон кыһалҕатын быһаарбыт, өйдөөбүт бары үлэһиттэргэ муҥура суох улахан махталбытын тиэрдэбит».
Бултаммыт кыыл олус улахан буолан, тыаттан таһаарарга тыраахтары туһаналларыгар тиийбиттэр. Оттон эһэни астыырга биир сууккаттан…
Өрөспүүбүлүкэ нэһилиэнньэлээх пууннара кыһыҥҥы суол аһыллыар диэри оттук-энергетика өттүнэн толору хааччылыннылар. Ол туһунан Ил Дархан…
Өлүөнэ өрүскэ муус туруон иннинэ муоста тутулла турар былаһааккатыгар өрүс флотун навигацията түмүктэннэ. Ааспыт сезон…
СӨ Үрдүкү Суута дьоҥҥо юридическай көмө оҥоробун диэн албыннаан харчы ылбыт юрист-урбаанньыт дьыалатын көрдө. Ол…
Хас биирдии сир, дойду бэйэтэ ураты тыыннаах. Архитектор сүрүн соруга — ол тыыны таба көрөн,…
Хоту сирин отонноругар — моонньоҕоҥҥо, сугуҥҥа уонна уулаах отоҥҥо — баар эттиктэр килиэккэ кырдьыытын бытаардар…