ВИДЕО: Саха сириттэн бэтэрээннэр «Бииргэ кыайыахпыт!» пуорумҥа кытыннылар

Москваҕа «Россия» национальнай кииҥҥэ «Бииргэ кыайыахпыт!» диэн байыаннай дьайыы бэтэрээннэрин пуорума буолан ааста. Онно дойду бары эрэгийиэннэриттэн 1000 кэриҥэ байыаннай дьайыы бэтэрээннэрэ, ону тэҥэ кинилэр дьиэ кэргэттэрин чилиэннэрэ кытыннылар, диэн «Аҕа дойдуну көмүскээччилэр» пуонда пресс-сулууспата суруйар.

РФ Бэрэсидьиэнэ Владимир Путин эҕэрдэтин кыттааччыларга РФ Бырабыыталыстыбатын бэрэссэдээтэлин солбуйааччы Татьяна Голикова ааҕан иһитиннэрдэ.

«Аҕа дойдуну көмүскээччилэрин өйөөһүн – биһиги быһаччы ытык иэспит, судаарыстыба уонна уопсастыба бииргэ үлэлиир соруктара. Ол иһин бүгүҥҥү көрсүһүү «Россия» национальнай киинигэр байыаннай дьайыы кыттыылаахтарын уонна бэтэрээннэрин, кинилэр аймахтарын уонна чугас дьоннорун, былаас уорганнарын, кэммиэрчэскэйэ суох тэрилтэлэри, биисинэс уонна эспиэр эйгэтин, дойду үгүс эрэгийиэннэриттэн иһитиннэрэр-биллэрэр сириэстибэлэр бэрэстэбиитэллэрин түмпүтэ үөрдэр», – диэн РФ Бэрэсидьиэнэ эҕэрдэтигэр этиллэр.

«Бииргэ кыайыахпыт» пуорум чэрчитинэн, байыаннай дьайыы бэтэрээннэрэ дьиэлэригэр төннөн кэлбиттэрин кэннэ, кинилэргэ көдьүүстээх өйөбүл систиэмэтин тэрийиигэ анаммыт пленарнай сессия ыытылынна. Саха сириттэн пуорумҥа байыаннай дьайыы бэтэрээннэрин дэлэгээссийэтэ кыттар, кинилэр хас биирдиилэрэ кыргыс хонуутугар хорсун быһыыларын көрдөрбүттэрэ, оттон билигин өрөспүүбүлүкэ уопсастыбаннай олоҕор көхтөөхтүк кытталлар. Кинилэр истэригэр – каадыр бырагырааматын кыттыылаахтара, патриотическай бырайыактары тэрийээччилэр уонна адаптивнай успуорка үрдүк ситиһиилэммит  күрэсчиттэр бааллар.

«Биһиэхэ, маннык улахан суолталаах федеральнай таһымнаах тэрээһиҥҥэ өрөспүүбүлүкэбит аатыттан кыттар – улахан чиэс. Манна биһиги бэтэрээннэргэ өйөбүл бастыҥ уопутун эрэ ылыммаппыт, ону тэҥэ Саха сиригэр биһиги көмүскээччилэрбитигэр көмө систиэмэтэ хайдах тутуллубутун – чөлүгэр түһэрииттэн саҕалаан уопсастыбаҕа бэйэни булунууга тиийэ – кэпсиэхпитин сөп», — диэн санаатын үллэһиннэ байыаннай дьайыы бэтэрээнэ Игорь Пахомов.

Санатан эттэххэ, пуоруму «Аҕа дойдуну көмүскээччилэр» пуонда, «Знание»  уопсастыба, байыаннай дьайыы бэтэрээннэрин Ассоциацията уонна Аҕа дойду буойуннарын дьиэ кэргэттэрин кэмитиэтэ тэрийдилэр.

https://t.me/gosfondyakutia/7177