Владимир Путин Арассыыйа Бэрэсидьиэнин быыбарыгар тэйиччиттэн олорон куоластаата

Владимир Путин Арассыыйа Бэрэсидьиэнин талар быыбарга онлайн-эрэсииминэн куоластаата.

Ол туһунан видеону Кириэмил пресс-сулууспата таһаарда. Видеоҕа көстөрүнэн, кини Ново-Огарево резиденцияҕа үлэлиир хоһугар олорон ыраахтан куолаһын биэрдэ. Бүллүтүөнү толорбутун кэнниттэн, компьютер экраныгар «Спасибо, вы успешно проголосовали!» диэн биллэрии кэллэ.

Арассыыйа Бэрэсидьиэнин талар быыбар кулун тутар 15-17 күннэригэр ыытыллар. Бу аан бастаан үс күн устатыгар ыытыллар уонна ыраахтан олорон электроннай куоластааһынынан быыбарга кыттыахха сөп.

Саха сиригэр бүгүн, кулун тутар 16 күнүттэн, быыбарга куоластааһын иккис күнэ саҕаланна. Сарсыарда 08:00 ч. 811 быыбардыыр учаастак үлэлиир. Бастакы күн түмүгүнэн, бэҕэһээ Саха сирин олохтоохторун кыттыыта 41,12% тэҥнэспит.