Ыам ыйын 20 күнүттэн Туймаада ыһыаҕар — балаакка миэстэтин талыы

Бу күннэргэ  “Туймаада ыһыаҕа-2024” национальнай бырааһынньык официальнай саайта үлэтин саҕалаата.

Дьокуускай куорат дьаһалтатын пресс-сулууспата иһитиннэрбитинэн, ыам ыйын 20 күнүттэн бу саайтка балаакка куоратыгар сайаапкалары ылыахтара. Ол эбэтэр киин куорат олохтоохторо уонна ыалдьыттара ыһыах кэмигэр сынньалаҥнарын атааралларыгар табыгастаах усулуобуйаны тэрийэр инниттэн,  эрдэттэн балаакка миэстэтин таларга кыах бэриллиэҕэ.

Интэриэһиргиир дьон саайтка ыһыах устуоруйатын, архыып матырыйаалларын, национальнай бырааһынньыгы тэрийии бэлэмэ хайдах ыытылларын, куонкурустар балаһыанньаларын, ыһыах бырагырааматын кытта билсиэхтэрин сөп. Быһата, быйылгы ыһыах туһунан иһитиннэрии, биллэрии барыта тута тахсан иһиэҕэ. Саайты бу сигэнэн булуохха сөп: https://ysyakh.yakadm.ru/. Бу күннэргэ манна ыһыах толору бырагыраамата бэчээттэниэҕэ.

“Күндү Саха сирин олохтоохторо уонна ыалдьыттара! Эһигини бэс ыйын 29-30 күннэригэр Үс Хатыҥҥа 2024 сыллааҕы Туймаада ыһыаҕар күүтэбит!”, – диэн “Туймаада ыһыаҕа-2024” национальнай бырааһынньыгы тэрийэр кэмитиэт ыҥырар.