Үөдүгэй төрөппүттэрэ оҕону иитии кистэлэҥнэрин туһунан кэпсэтэллэр

Бэҕэһээ Үөһээ Бүлүү улууһун Үөдүгэй нэһилиэгин бибилэтиэкэтигэр К. С. Чиряев аатынан норуот педагогикатын киинин методистара, «Учууталлар учууталлара» Федора Васильева, Дьоруой ийэ Валентина  Осипова, дириэктэр Раиса  Васильева  төрөппүттэри кытары көрсөн оҕо иитиитин кистэлэҥнэрин кэпсээтилэр. Бу туһунан Үөдүгэй нэһилиэгин дьаһалтатын пресс-сулууспата иһитиннэрэр.

Сүрүнүн сүһэн ылан билиһиннэрдэххэ, хас биирдии ыалга аҕа оруола, суолтата улаханын кэпсээтилэр. Кини баара оҕо олоҕор олус элбэҕи биэрэрин, тирэх буоларын туһунан дьиҥ олохтон холобурдаан туран кэпсээтилэр. Оҕо 90% төрөппүтүн көрөн үөрэнэр. Онон эһиги оҕоҕутун тус холобургутунан иитэргитин умнумаҥ диэн сүбэлээтилэр.

Сир үрдүгэр саамай ыарахан идэ — салайар уонна иитэр үлэ диэн тоһоҕолоон бэлиэтээтилэр. Кырдьыга даҕаны оҕону кытта кыра сааһыттан аһаҕастык уонна истиҥник кэпсэтии наада. Улуу педагог Г. Н. Волков эппитинэн, аан дойдуга үс улахан куттал баар. Ядернай сэрии, арыгы уонна тэлэбиисэр, төлөппүөн содула.

Эн баҕар сэттэ да үөрэхтээх буол, төрүт дьарыккын, үгэстэргин, төрөөбүт тылгын билбэт буоллаххына, олоххо бэлэмэ суох буолаҕын. Бу курдук оҕону иитии боппуруостарыгар саамай тоҕоостоох, туһалаах сүбэлэри иһиттилэр.