Үөрэҕи уонна билими кэтээн көрөр федеральнай сулууспа эксээмэн бэрээдэгэр уонна ыытыллар күннэригэр уларытыылары киллэрэргэ бэлэм

Үөрэҕи уонна билими кэтээн көрөр федеральнай сулууспа биир кэлим эксээмэн бэрээдэгэр уонна ыытыллар күннэригэр кылгас кэм иһигэр уларытыылары киллэрэргэ бэлэмин туһунан иһитиннэрдэ. Тоҕо?

Соторутааҕыта дойду Бэрэсидьиэнэ Владимир Путин Федеральнай Мунньахха туһаайбыт этиитигэр, биир кэлим эксээмэҥҥэ оҕолор талан ылбыт биир биридимиэттэригэр эксээмэннэрин хаттаан туттаралларыгар кыахта биэриэххэ диэн эппитэ. Бу иннинээҕи сылларга оҕолор эксээмэннэрин түмүгүн тупсарыахтарын баҕарар буоллахтарына, эһиилигэр эрэ туттарар кыахтаахтара. Дойду Бэрэсидьиэнэ эксээмэни хаттаан үрдүк үөрэххэ сайабылыанньаны ылыы болдьоҕо түмүктэниэн иннинэ, ол сыл туттарыахтаахтар диэн иһитиннэрбитэ. Маны ордук төрөппүттэр биһирии истибиттэрэ.

Үөрэҕи уонна билими кэтээн көрөр федеральнай сулууспа: “Тустаах боппуруос холбоһуктаах буоларын быһыытынан, биир кэлим эксээмэни тэрийиигэ уонна үрдүк үөрэх тутар хампаанньаларын болдьоҕун кытта тэҥҥэ быһаарыы ылыныллара ирдэнэринэн, саҥаны олоххо киллэриини сиһилии РФ Үөрэҕириигэ министиэристибэтэ итиэннэ РФ Билимин уонна үрдүк үөрэҕин министиэристибэтэ оҥороллор. Ону таһынан, боппуруос тэрийэр-технологическай хааччыйыы чааһыгар Арассыыйа субъектарын кытта  бииргэ үлэлэһиэхтэрэ”, — диэн суруйар.