Эксээмэҥҥэ талар биридимиэти оскуоланы бүтэрээччилэр хаттаан от ыйын 4 уонна 5 күннэригэр туттарыахтарын сөп

Биир кэлим эксээмэн талар биридимиэтин оскуоланы бүтэрээччилэр быйылгы үрдүк үөрэх хампаанньата түмүктэниэр диэри, хаттаан от ыйын 4 уонна 5 күннэригэр туттарыахтарын сөп. Ити туһунан РФ Бырабыыталыстыбатын бэрэссэдээтэлэ Михаил Мишустин бэҕэһээ иһитиннэрдэ.

“Оҕолор, биллэн турар, долгуйаллар, олоххо туох баҕарар буолуон сөп. Өскөтүн оҕо долгуйан үлэтин хаачыстыбалаахтык оҥорботох буоллаҕына, бу кини дьылҕатыгар, инники сайдыытыгар кириэс ууруон сөп”, – диэн бэрэссэдээтэл Судаарыстыбаннай Дуумаҕа отчуотун кэмигэр бэлиэтээтэ.

Санатан эттэххэ, дойду бэрэсидьиэнэ Владимир Путин Федеральнай Мунньахха Анал туһаайыытыгар биир кэлим эксээмэн биир талар биридимиэтин хаттаан туттаралларыгар кыахта биэриэҕиҥ диэн сорудахтаабыта.