100 сааһын туолбут ытык кырдьаҕаһы наҕараадалаатылар

Сэтинньи 8 күнүгэр 100 сааһын туолбут ытык кырдьаҕаска «Үйэ саас» бэлиэни туттарар туһунан Ил Дархан Айсен Николаев ыйааҕа таҕыста.

Ол курдук, 82 нүөмэрдээх «Үйэ саас» ытык бэлиэнэн Мииринэй оройуонун Бочуоттаах олохтооҕо, Аҕа дойду улуу сэриитин бэтэрээнэ, РСФСР уонна Саха АССР үтүөлээх учуутала Проворотова Нина Ильинична наҕараадаланна. Кини лоп курдук 100 сааһын туолла.

«Үйэ саас» бэлиэ уһун үйэлээхтэри өйүүр, кинилэр уопсастыбаннай олоххо кылааттарын билинэн, норуот духуобунай уонна үлэҕэ үгэстэрин бэлиэтиир туһуттан олохтоммута. Бу бэлиэ 2003 сылга олохтонуоҕуттан, 82 киһиэхэ туттарылынна. Бэлиэни кытары 100 тыһыынча солкуобай туттарыллар.

Сахастат дааннайдарынан, кэнники 10 сылга уһун үйэлээх ахсаана эбиллибит. 2023 сыл тохсунньу 1 күнүнээҕи туругунан, 60-тан аҕа саастаахтар — 211 895 киһи, 80-рын ааспыттар — 13 608 киһи, 90-рын ааспыттар — 1,78 тыһыынча (ол иһигэр 1,32 тыһыынча дьахтар) киһи баар.