811 быыбардыыр учаастак үлэтин саҕалаата

Бүгүн Саха сирин бары 811 быыбардыыр учаастагар куоластааһын саҕаланна.

Бу күннэргэ быыбар хамыыһыйалара бары сүүнэ улахан тэрээһин үлэтин ыыттылар. Быыбары тэрийээччилэр күнүскү даҕаны, ыраахтан даҕаны анал үөрэхтэри аастылар. Быыбар ыытыллар болдьоҕун иннинэ кытыы сытар, уустук суоллаах-иистээх сирдэргэ олорор 12 633 киһи куоластаата. «ИнформУИК» бырайыагынан, учаастактааҕы быыбардыыр хамыыһыйа чилиэннэрэ 299 158 ыалга сылдьан уонна 466 786 быыбардааччыга тус бэйэлэригэр быыбар туһунан кэпсээтилэр.

Саха сиригэр быыбардааччылар ахсааннара 2024 сыл тохсунньу 1 күнүнээҕи туругунан 638 429 киһи этэ.  Оттон быыбары тэрийээччилэр ахсааннара – 7 101 киһи.

Ханна тиийбитинэн куоластыырга испииһэккэ киллэрэргэ 74 491 киһи сайабылыанньа биэрбитэ.

283 быыбардыыр учаастакка 566 кэтээн көрөр камералар, 333 металлодетектор уонна 64 учаастакка КОИБ турдулар.