Айсен Николаев Марат Хуснуллины кытта көрүстэ

Көрсүһүүгэ сүрүн болҕомто Саха сиригэр национальнай бырайыактары уонна РФ Бэрэсидьиэнин сорудахтарын олоххо киллэриигэ уурулунна.

«Айсен Сергеевич хамаандата «Олорор дьиэ уонна куорат эйгэтэ» национальнай бырайыагынан үчүгэй түмүктэри көрдөрдө. Саха сиригэр былырыын олорор дьиэни тутууга рекорд олохтоммута — 705 тыһ.кв. м ордук иэннээх олорор дьиэ тутуллан үлэҕэ киирбитэ. Онуоха быйыл сэтинньи 1 күнүгэр номнуо 620 тыһ.кв.м. туттарыллыбыт, бу ааспыт сыл туһааннаах кэминээҕэр 28% улахан. Маны таһынан Саха сиригэр хаарбах туруктаах дьиэттэн көһөрүүгэ үлэ далааһыннаахтык ыытыллар. 2019 сылтан хаарбах дьиэттэн 757 тыһ.кв.м. ордук иэннээх сиргэ көһөрүү үлэтэ ыытылынна, 41 тыһ. кэриҥэ киһи олорор усулуобуйата тупсарылынна. Биллэн турар, бу үлэ салҕанар. Маны сэргэ, суол ситимин саҥардыы үлэтэ ыытыллар. Нуорумаҕа эппиэттиир эрэгийиэннээҕи айан суола  58,5% тэҥ«, — диир Марат Хуснуллин.

«Быйыл Саха сиригэр 750 тыһ.кв.м. итэҕэһэ суох иэннээх олорор дьиэ киллэриллиэҕэ. Бу федеральнай киин, эрэгийиэннээҕи Бырабыыталыстыба уонна тутуу секторын холбоһуктаах күүстэринэн кыаллар ситиһии. Сайдыы итинник тэтиминэн барара Саха сирин дьонун-сэргэтин олоҕун хаачыстыбатын салгыы тупсарыа диэн эрэнэбин«, — диэн бэлиэтиир Айсен Николаев.

Көрсүһүүгэ инфраструктурнай бүддьүөт кирэдьииттэрин көмөтүнэн бырайыактары олоххо киллэрии боппуруостара таарылыннылар. Бырабыыталыстыба Бэрэссэдээтэлин солбуйааччы бэлиэтээбитинэн, Саха сирэ территорияны кэлимник сайыннарыы мэхэньиисимин туһанар. Онуоха билигин куораты тутуохха сөптөөх 211 га уопсай иэннээх 12 сир-уот быһаарыллыбыт. Итинтэн алта сиргэ номнуо территорияны кэлимник сайыннарыы (КРТ) бырайыактарын олоххо киллэрии саҕаламмыт.

Өрүттэр Бэрэсидьиэн сорудаҕынан ыытыллар Өлүөнэни туоруур муостаны тутууну дьүүллэстилэр. Өлүөнэ муостата аныгы Арассыыйаҕа биир саамай улахан инфраструктурнай бырайыактартан биирдэстэринэн буолар.