Александр Артемьев: «Биһиги, тыа хаһаайыстыбатын эйгэтин үлэһиттэрин түмэр ассоциация, тус көмөбүтүн ыыта олоробут»

Арассыыйа-Украина сыһыаннарыгар биир дойдулаахтарбыт, биллэр-көстөр салайааччыларбыт санааларын этэллэр, биир санаанан салайтаран түмсүөҕүҥ дииллэр. 

Александр Артемьев, СӨ Бааһынай хаһаайыстыбаларын уонна тыа хаһаайыстыбаларын кээпэрэтииптэрин ассоциациятын бэрэсидьиэнэ:
— Биһиги дойдубут бу киирсиигэ хайаан да кыайыахтаах-хотуохтаах диэн санаанан олох-дьаһах оннун булан, үчүгэй буоларыгар дьулуһабыт. Саха дьоно Арассыыйа олохтоохторун быһыытынан судаарыстыба ыытар бэлиитикэтин өйдүүбүт, өйүүбүт. Бастакы хомуурга барбыт уолаттарбыт этэҥҥэ эргиллэн кэлэллэригэр баҕарабыт. Хас биирдии эр киһи бэйэтин ытык иэһин толорор кэмэ тирээн кэллэ, онтон хайдах да төлөрүйбэккин.
Биһиги Ассоциациябыт аппараата көмөҕө диэн 50 тыһыынча солкуобайдаах берцы уонна сылаас ис таҥас ылан биэрбитэ. Ону таһынан Ассоциация Сэбиэтин чилиэннэрэ 30-тан тахса тыһыынчалаах көмөнү эмиэ илдьэн туттарбыппыт.
Биһигиттэн үс уол ыҥырыллан барбытыттан, биир сыыйыллан төннөн кэлбитэ. Онон икки сэриигэ сылдьар уолаттарбытыгар тус аадырыстаан көмөлөһүөхпүт. Бары биир киһи курдук, күүспүтүн түмүнэн, туруннахпытына, кыайыахпыт!