Аллараа Бэстээххэ икки массыына харсыспыт

Бүгүн Мэҥэ Хаҥалас улууһун Аллараа Бэстээх бөһүөлэгэр бэнсиин тиэйэр уонна таһаҕас таһар массыыналар харсыспыттарын туһунан иһитиннэрии киирдэ.

Суол быһылаанын түмүгэр бэнсиин тиэйэр массыына систиэринэтэ алдьаммыт, уматык тохторо бэлиэтэммит. Билигин уматыгы хачайдыыллар. Дьолго, ким даҕаны эмсэҕэлээбэтэх.

Суолу бүөлээбиттэр, массыыналар атын тумнар суолунан сылдьаллар. Суол быһылаана тахсыбыт сиригэр өрөспүүбүлүкэтээҕи баһаарынайдар куттал суох буолууга постарын туруордулар, ГИБДД үлэһиттэрин сыһыардылар. Төһө уматык тохтубутун быһаарар уонна сыаналыыр соруктаах экологияны кэтээн көрөр тэрилтэ үлэһиттэрэ тиийдилэр.