Амур уобалаһыгар Саха сириттэн быыһааччылар көмөҕө тиийдилэр

Сиҥнибит шахтаҕа хаайтарбыт дьону быыһыы Арассыыйа ЫБММ эбии күүстэри ыыталыыр. Ол туһунан Арассыыйа Ыксаллаах быһыыга-майгыга миниистирэ Александр Куренков соруйда.

«Пионер» рудникка быыһыыр үлэлэри ыытыы боппуруостарын РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин боломуочуйалаах бэрэстэбиитэлэ Юрий Трутнев салайыытынан суһал мунньахха дьүүллэстилэр диэн ЫБММ Саха сиринээҕи салаата иһитиннэрэр.

Амур уобалаһыгар ыксаллаах быһыы-майгы эрэсиимэ биллэриллэн турар. Шахта сиҥниитин түмүгэр 13 киһи сир анныгар хаайтарбыта сабаҕаланар.

Бу күннэргэ Саха сириттэн Нерюнгритааҕы хайа быыһааччыларын взвода Амур уобалаһыгар көмөҕө тиийдэ. Барыта 25 киһи уонна 4 тиэхиньикэ эбии күүс быһыытынан тиийэн быыһыыр үлэҕэ көмөлөһө сылдьар. Биһиги быыһааччыларбытын сэргэ Хабаровскай уонна Приморскай кыраай быыһааччылара бааллар, уопсайа 114 быыһааччы уонна 45 тиэхиньикэ үлэлиир.