«Азия оҕолорун» уотун эстафетата Аллайыаханы ааста

«Азия оҕолоро» норуоттар икки ардыларынааҕы успуорт оонньууларын эстафетатын муус устар 17 күнүгэр Аллайыаха улууһугар көрүстүлэр.

Билиҥҥи туругунан эстафета кыттыылаахтара 14 тыһ. тахса км айаннаатылар, тэрээһиҥҥэ  барыта 190 факелы тутааччы кытынна. «Эстафета биир сомоҕо буолуу уонна доҕордоһуу бэлиэтэ», – диэн Ил Дархан Айсен Николаев бэлиэтээбитэ.

«Азия оҕолоро» VIII Норуоттар икки ардыларынааҕы успуорт оонньууларын уотун эстафетата кулун тутар 19 күнүттэн бэс ыйын 26 күнүгэр диэри  36 улууска уонна куораттар уокуруктарыгар ыытыллар. Өрөспүүбүлүкэ үрдүнэн барыта 550 факелы тутааччы уоту күөрэччи көтөҕүөҕэ.

Уот эстафетата быйыл кулун тутар 20 күнүттэн оонньуулары төрүттээбит Саха сирин Бастакы Бэрэсидьиэнэ Михаил Ефимович Николаев төрөөбүт Хаҥалас улууһун Покровскай куоратыттан саҕаланан, номнуо Хаҥалас, Горнай, Бүлүү, Үөһээ Бүлүү, Ньурба, Сунтаар, Мииринэй, Ленскэй, Анаабыр, Өлөөн, Булуҥ, Эдьигээн уонна Усуйаана улуустарыгар тиийбитэ.  Бүгүн, муус устар 18 күнүгэр, Аллайыаха улууһуттан уот эстафетатын Аллараа Халымаҕа күүтэллэр. Саха сирин үрдүнэн уот эстафетатын уопсай уһуна 37 тыһ. км, итинтэн 14183 км айаннаата.

Санатан эттэххэ, 2024 сыллаахха VIII «Азия оҕолоро» норуоттар икки ардыларынааҕы успуорт оонньуулара Саха сиригэр төннөн, Дьокуускайга бу сыл бэс ыйын 25 күнүттэн от ыйын 7 күнүгэр диэри  ыытыллыахтара. Эдэр спортсменнар 239 кэмпилиэгинэн 24 көрүҥҥэ наҕараадаланыахтара. «Азия оҕолоро» оонньууларын Саха сирин бастакы Бэрэсидьиэнэ Михаил Николаев тэрийбитэ уонна аан бастаан 1996 сыллаахха ыытыллыбыта .

СӨ Ил Дарханын уонна Бырабыыталыстыбатын пресс-сулууспата