Байыастар харахтара мөлтөөбүтүн босхо эпэрээссийэлэтиэхтэрэ

Ил Дархан сорудаҕынан, анал байыаннай дьайыы кыттыылаахтара Дьокуускайдааҕы офтальмологическай килиньиичэскэй балыыһаҕа харах мөлтөөбүтүн көннөрөр лазернай эпэрээссийэни босхо оҥорторор кыахтаннылар.

— Биһиги хорсун буойуттарбытыгар саҥаттан саҥа өйөбүл көрүҥнэрин киллэрэбит. Норуот дьокутааттарын кытта көрсүһүүгэ мин офтальмологическай балыыһа кылаабынай бырааһа Иван Петрович Луцкаҥҥа байыаннай дьайыы кыттыылаахтарын мөлтөөбүт харахтарын босхо көннөрөр көмө мэхэньиисимин толкуйдууругар сорудахтаабытым. Манна уоппускаҕа кэлбит байыастар, эбэтэр, байыаннай хантараак баттаһыахтарын баҕарар дьон лазерынан эпэрээссийэни ааһыахтарын сөп. Кыргыһыыга кыраҕы харах туохтааҕар да наада.

Билигин бу көмө миэрэтэ үлэлиир буолла! Бу сайыҥҥыттан байыастар Дьокуускайдааҕы офтальмологическай килиньиичэскэй балыыһаҕа харах мөлтөөбүтүн көннөрөр лазернай эпэрээссийэни босхо оҥорторор кыахтаннылар, — диэн Айсен Николаев телеграм-ханаалыгар суруйда.

Биллэн турар, лазернай коррекция эпэрээссийэтэ киһиэхэ барытыгар оҥоһуллубат, киһи сааһынан, харах бүрүөһүнүн туругунан хааччахтар бааллар. Онон баҕалаахтар бастаан  «Аҕа дойдуну көмүскээччилэр» пуонда филиалыгар баран, исписэлиистэргэ көрдөрүөхтэрин наада.

Санатар буоллахха, Дьокуускайдааҕы офтальмологическай килиньиичэскэй балыыһа быраастара хаста да Донецкай, Луганскай Норуодунай Өрөспүүбүлүкэлэргэ баран, үлэлээн,  дьоҥҥо көмөлөһөн, олохтоохтор махталларын ылан кэлбиттэрэ.