Балаҕаннаахтар бырабыыталыстыба отчуотун биһирээтилэр

Өрөспүүбүлүкэ ситэриилээх былааһын 2023 с. үлэтин түмүгүнэн отчуота бүгүн, олунньу 7 күнүгэр Үөһээ Бүлүү улууһун Балаҕаннаах нэһилиэгэр салҕанар. Балаҕаннаах — улуус кииниттэн чугас сытар аҕыйах нэһилиэнньэлээх кыракый дэриэбинэ. Үгэс курдук, тэрээһин Арассыыйа уонна Саха Өрөспүүбүлүкэтин өрөгөй ырыатынан аһылынна.

Саҥа талыллыбыт Үөһээ Бүлүү улууһун баһылыга Валерий Николаев кинини итэҕэйэн, куоластаан талбыттарынан мустубут дьоҥҥо махталын, инникитин улуус олохтоохторун эрэллэрин толоруоҕун эттэ. Салгыы бөлөҕү салайан илдьэ сылдьар өрөспүүбүлүкэ экэниэмикэтин миниистирэ Петр Попов Саха сирин социальнай-экэнэмиичэскэй сайдыытын, ааспыт сыллааҕы ситиһиитин туһунан кэпсээтэ.

Бастакынан, саҥа оскуоланы туттарарга туруорустулар. Оскуола самнан эрэринэн, сорох оҕолор ыаллыы сытар нэһилиэктэргэ баран үөрэнэллэр, уопсай дьиэ суох буолан, эдэр исписэлиистэр кэлбэттэр эбит. Отчуоттуур бөлөх мунньах иннинэ нэһилиэк эбийиэктэрин көрөн баран көмөлөһүөххэ наада диэтэ.

Салгыы Балаҕаннаах нэһилиэгин баһылыга Степан Дмитриев сүрүн туруорсар боппуруос оскуола тутуллуута буоларын эттэ. Кини Балаҕаннаах агрооскуолатын үлэтин тэрийбит, өр сылларга дириэктэринэн үлэлээбит Лидия Васильева туруорсан, бастаан биэс сылгыны ылан кымыһы оҥорууну тэрийбитин кэпсээтэ. Маннык кымыһынан дьарыктанар агрооскуола өрөспүүбүлүкэҕэ суоҕун эттэ. Билиҥҥитэ 30 төбө сылгылаахтар, материальнай-тэхэньиичэскэй бааза тэринэн, 50 төбөҕө диэри элбэтэн, кыһыннары-сайыннары дьарыктанар былааннаахтар. Итиниэхэ субсидия наадатын эттилэр.

Нэһилиэк тыа хаһаайыстыбатыгар исписэлииһэ Одунча Чаҥый бүтэй тутарга, кымыһы оҥорууну сайыннарарга, ходуһаны туһаныыга кыһалҕалары эттэ. Кини инникитин Балаҕаннаах сайдар суолунан оҕо доруобуйатын чэбдигирдэр аналлаах киини тэрийиэхпитин баҕарабыт диэн этиитин сэргии иһиттим. Онуоха кымыһы оҥорон дэлэтии төһүү буолуохтаах. Тыа хаһаайыстыбатын министиэристибэтин өттүттэн төбөҕө көрүллэр субсидияны ылаллар, оттон материальнай баазаны тупсарыыга көмөҕө киирсии олус уустугун эттэ. Туруорсуулара наадалааҕынан ааҕан, мунньах боротокуолугар киллэрдилэр.

Ситэриилээх былаас уорганын нэһилиэнньэни кытары көрсүһүүтүн түмүктүүр түһүмэҕинэн үөрэх миниистирин солбуйааччы Алевтина Аргунова Үөрэх министиэристибэтин аатыттан Балаҕаннаах оскуолатын завуһугар Ольга Ботуеваҕа Махтал суругун туттарыыта буолла.

Балаҕаннаахтар өрө көтөҕүллэн туран ытыс тыаһынан доҕуһуоллатан Бырабыыталыстыба бу сыллааҕы нэһилиэнньэҕэ отчуотун биһирииллэрин биллэрдилэр.