Бэйэ учаастагын бөҕүнэн толорон тэҥниир сөп дуо?

Дьокуускай куорат улаатар, тэнийэр. Тутуу тэтимнээхтик барар,  онон саҥа учаастактары биэрэллэр. Үксүгэр саҥа учаастактар намыһах, бадарааннаах, уулаах-хаардаах сирдэргэ түбэһэллэр. Оччоҕуна учаастагы бас билээччилэр сирбитин хайдах үрдэтэбит диэн толкуйга түһэллэр.

— Учаастагы тугунан толорон, тэҥниэххэ сөбүй?

Ыйытыыга Дьокуускайдааҕы экологияны судаарыстыбаннай кэтээн көрүүгэ кэмитиэтин салайааччытын солбуйааччы Мария Мигалкина маннык хоруйдаата:

— Кэнники сылларга учаастагы, сири араас бөҕүнэн-сыыһынан  толорон, тэҥниир буоллулар. Ол курдук,  көтүллүбүт дьиэттэн маһы-сыыһы, массыына эргэ кузовын, оннооҕор хомунаалынай тобоҕу кытта туһанар буоллулар.  Дьокуускайдааҕы экологияны судаарыстыбаннай кэтээн көрүүгэ кэмитиэтэ ханнык баҕарар тобохторунан сири-хайаҕаһы толоруу бобуулааҕын туһунан сэрэтэр. Толорон тэҥнииргэ айылҕа матырыйаалын эрэ туһаныҥ. Ол курдук, кумаҕы, үлтүркэй тааһы, буору,  гравийы. Онуоха уу эбийиэктэрин түгэҕэ уонна кытыла уларыйыа суохтаах.