Бэрдьигэстээх ыччаттара төрөөбүт дойдуларын сайдыытын торумнаатылар

Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр.

Бу туһунан Бэрдьигэстээх дьаһалтатын ыччат ааҕыныстыбатын пресс-сулууспатын салайааччыта Роман Дмитриев маннык сырдатта:

— Кылгастык устуоруйаны  сэгэтэн көрөр буоллахха, 1940 сыллаахха алтынньы 26 күнүгэр Саха АССР Үрдүкү Президиумун уураҕынан  Бэрдьигэстээх нэһилиэгин сэбиэтэ тэриллибитэ. Бу бэлиэ күҥҥэ анаан, нэһилиэк ыччаттарыгар  Бэрдьигэстээх 2050 сылга диэри сайдыытын торумугар анаммыт форсайт-сиэссийэни тэрийэн ыыттыбыт.

Тэрээһин ыччат хамаандаларын ортотугар сыл устата ыытыллар «Сэргэх сэлиэнньэ» бэстибээл-спартакиада иитинэн барда. “Эйэ” кафеҕа сэлиэнньэ тэрилтэлэриттэн хомуллубут 4 хамаанда: «Берд саас», «Ыччатс», «Чыпчаал» уонна «Сайдыы» кыттыыны ыллылар. Хамаандалар бырайыактарын тиэмэтин сэрэбиэйинэн таллылар. Ол курдук, «Берд саас» — үөрэхтээһин, «Сайдыы»- цифровизация, «Ыччатс» — айылҕа харыстабыла уонна тыа хаһаайыстыбата,  «Чыпчаал»- сынньалаҥ уонна култуура тиэмэлэрин арыйдылар.

Хамаандалар бастаан утаа суруйар бырайыактарын ырытыстылар, онтон бэриллибит 30 мүнүүтэ иһигэр талбыт тиэмэлэринэн 2050 сылга диэри Бэрдьигэстээх сайдыытыгар туһуламмыт бырайыактары суруйдулар. Ол кэннэ 5 мүнүүтэ бэлэмнэнэн баран, дьүүллүүр сүбэ иннигэр тахсан, көмүскээтилэр, ыйытыктарга хоруйдаатылар.

Дьүүллүүр сүбэҕэ дьаһалта баһылыга Алексей Аргунов, баһылыгы солбуйааччы Ксения Васильева, улуустааҕы тыа хаһаайыстыбатын салаатыттан Екатерина Павлова, улуустааҕы  «СИТИМ» бырайыактыыр киин  салайааччыта  Семен Семенов уонна нэһилиэк дьокутаата Михаил Оленов үлэлээтилэр. Үлэлэри сыаналааһыны дьүүллүүр сүбэ эрэ буолбакка, хамаандалар бэйэ-бэйэҕэ куоластааһыннара эмиэ быһаарда. Холобур, «Ыччатс» хамаанда «Хотугу хаһаайыстыба» — «Кыһыҥҥы тэпилииссэ» онтон «Берд саас» — 45 саастарыттан идэлэрин судургутук уларытан, атын хайысхаҕа үлэлииллэригэр туһуламмыт  бырайыактары көмүскээбиттэрин өйөөтүлэр.

Түмүккэ, «Ыччатс» хамаанда сэртипикээтинэн наҕараадаланна. «Чыпчаал» — 3 миэстэ,  «Берд саас» – 2-с миэстэ уонна муҥутуур кыайыылааҕынан «Сайдыы» хамаандата буолла.

Бу күн ыччаттар  айан таһаарбыт бырайыактара  салгыы  чочуллан, нэһилиэк сайдыытыгар төһүү күүс буолуохтарын сөп. Эдэр дьон  төрөөбүт-үөскээбит, олорор нэһилиэктэрин сайдыытыгар саҥаны айарга-тутарга дууһаларын биэрэн туран үлэлээн, сонун сүүрээннэри тобулан, олус астынан, сэргэхсийэн, саҥаны, үйэлээҕи тобулуохтарын өссө күүскэ баҕардылар.

… Ити курдук, Бэрдьигэстээх ыччаттара төрөөбүт дойдуларын сайыннарарга аналлаах бэртээхэй тэрээһини ыытан, өрөспүүбүлүкэ улуустарын нэһилиэктэригэр бастыҥ холобуру көрдөрдүлэр. Бу маннык тэрээһиннэри ыытан, кэлэр 2027 сыл барылын оҥосторго үлэ бу  уопутун хото туһанаргытыгар сүбэлиибит.