Оҕолоох ыал массыына атыылаһарыгар чэпчэтиилээх кирэдьиити туһаныан сөп

Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха сөп. Ким туһаныан сөбүй? Туох ирдэбиллээҕий? Бу туһунан Объясняем.РФ суруйар.

Усулуобуйата бырагырааматтан тутулуктаах

«Дьиэ кэргэн массыыната» — икки эбэтэр онтон элбэх сокуоннай сааһын ситэ илик оҕолоох төрөппүттэргэ, эпэкииннэргэ, оҕону иитэ ылааччыларга, көрөөччүлэргэ (попечитель), ону тэҥэ инбэлиит оҕолоох дьиэ кэргэттэргэ аналлаах. Чэпчэтии кээмэйэ — 10%. Уһук Илин олохтоохторугар туспа усулуобуйа: ыал биир эрэ оҕолоох буолуон сөп, оттон чэпчэтии суумата 25% тэҥнэһэр.

«Бастакы массыына» — урут бэйэтин аатыгар массыыналана сылдьыбатах дьоҥҥо аналлаах. Атыылаһааччы бу ирдэбилгэ хапсыахтаах: быраас эбэтэр үөрэх үлэһитэ, анал байыаннай дьайыы кыттыылааҕа эбэтэр кини дьиэ кэргэнин чилиэнэ; инбэлиит киһи; биир да буоллар кыра саастаах оҕолоох төрөппүт эбэтэр эпэкиин, байыаннай биэнсийэлээх. Чэпчэтии — 20%, Уһук Илин олохтоохторугар — 25%.

Ханнык массыыналары атыылаһыахха сөбүй?

Бырагыраама саҥа, олохтоох таҥыы массыыналарга эрэ көрүллэр. Иһинээҕи уматыынан (ДВС) үлэлиир массыына сыаналара 2 мөл. солк. ыарахан буолуо суохтаах — испииһэккэ Lada уонна УАЗ моделлара киирэллэр.

Туохха болҕомтону ууруохха нааданый:

— массыынаны толору уу харчытыгар атыылаһар табыллыбат, кирэдьиит оҥорторор наада;

— харчыны илиигэ биэрбэттэр, быһаччы бааҥҥа ыыталлар;

— иэһи төлөөн бүтүөххүтүгэр диэри массыына солуокка сылдьар;

— кирэдьиит ылааччы бу эбэтэр ааспыт сылга атын массыынаҕа кирэдьиитэ суох буолуохтаах.