Билигин болҕомто үрэхтэргэ ууруллар
«Билигин болҕомто күөнүгэр Горнай улууһун үрэхтэригэр уу киириитигэр сылдьар», – диэн СӨ Гражданскай оборуонаҕа, нэһилиэнньэҕэ куттал суох буолуутун хааччыйыыга миниистир Дмитрий Лепчиков ыам ыйын 8 күнүгэр брифинг кэмигэр эттэ.
Бэс Күөлүн аттынааҕы Дьүктүөнэ үрэх уонна Өрт сэлиэнньэтин аттыгар Хаар Балаҕан үрэҕэр уу таһыма үрдээн иһэр, ол эрээри, муҥутуур кэрдииһи таһынан таһымныы илик.
— Бу үрэхтэри хонтуруолга тутабыт. Бүгүҥҥү туругунан, муҥутуур таһымтан намыһах, ол эрээри, бу күннэргэ уу таһыма үрдүөн сөп. Сабаҕалааһын быһыытынан, улахан уу кэлиэ суоҕа, — диэн миниистир эттэ. Орто Сурт-Кэптин суолун 32-с килэмиэтиригэр суолу уу үрдүнэн таһымнаата. Онон уу түһүөр диэри тырааныспар сырыытын хааччахтаатылар.
Өлүөнэ өрүскэ муус Ленскэй оройуонугар устар. Алларааҥҥы кырыыта Крестовскай гидропост, үөһээҥҥи кырыыта — Пеледуй аттынан баар. Көмүөл устата 34 килэмиэтир. Суукка иһигэр 20 килэмиэтир сыҕарыйда. Ленскэй-Мурья учаастагар муус хамсаата, биир-икки хонугунан устуоҕа. Муус устуута 3-4 хонук эрдэлээн иһэр.
Бүгүн Ньүүйэ өрүс Өлүөнэҕэ түһэрэ күүтүллэр. Орто Наахара аттынан уу таһыма 700 см, муҥутуур кэрдииһэ — 1000 см. Бүлүү өрүскэ Улахан Ботуобуйа үрэх мууһун киллэрэн, Мииринэй оройуонун Сүлдьүкээр гидропуоһун аттынан 6 хонук эрдэлээн, муус хамсаата. Сунтаар улууһугар уу таһыма 40-60 см үрдээтэ, өрүс ырбыыланна. Сунтаар-Кириэстээх учаастагар үс хонук иһинэн муус хамсыыра күүтүллэр.
Амма, Алдан өрүстэргэ муус хойуутук устар. Хаандыга аттынан суукка иһигэр 87 см, Кириэс-Халдьаайы аттынан 14 см үрдээтэ. Хотугу өрүстэргэ кыһыҥҥы эрэсиим оннунан хаалар. Халыма өрүс эрдэлээн эстэрэ күүтүллэр.
Ил Дархан, бырабыыталыстыба дьаһалтатын пресс-сулууспата.
Сообщить об опечатке
Текст, который будет отправлен нашим редакторам: