Бороҕоҥҥо волейболга чөмпүйэнээт саҕаланна

Уус Алдан улууһугар  Бороҕоҥҥо Н.Н.Тарскай аатынан успуорт комплексыгар быйыл номнуо үһүс төгүлүн улахан күрэхтэһии ыытыллар.

Бу иннинэ көҥүл тустууга уонна мини-футболга Саха сирин чөмпүйэнээтэ өрө көтөҕүллүүлээхтик буолан ааспыттара. Билигин дьахталлар хамаандалара күрэхтэһэллэр.

«Кэнники сылларга биһиги өрөспүүбүлүкэбитигэр волейболлааччылар элбээтилэр, үчүгэйдик тарҕанан эрэр. Саастарыттан тутулуга суох уонна Сахабыт сирин бары кэриэтэ улуустарыгар дьарыктаналлар», — диэн бэлиэтиир СӨ Бырабыыталыстыбатын бэрэссэдээтэлин солбуйааччы Сергей Местников.

Бастакы лигаҕа мэтээл иһин өрөспүүбүлүкэ алта бастыҥ хамаандата күөн көрсөр. Манна бааллар Мэҥэ Хаҥалас, Нам, Чурапчы, Уус Алдан, Мииринэй уонна Дьокуускай куорат спортсменкалара.

СӨ Ил Дарханын уонна Бырабыыталыстыбатын пресс-сулууспата