Бүгүн ситэриилээх былаас нэһилиэнньэҕэ отчуота Мэҥэ Хаҥалас Төхтүрүгэр салҕанар

Бүгүн ситэриилээх былаас нэһилиэнньэҕэ отчуота Мэҥэ Хаҥалас Төхтүрүгэр салҕанар. Нэһилиэнньэлиин көрсүһүү Өрөгөй ырыатынан саҕаланна. Үөрүүлээх быһыыга-майгыга Төхтүр орто оскуолатын учуутала Дмитрий Григорьевка үөрэх министиэристибэтин бочуотунай грамотатын туттардылар.

Былырыын 6 боппуруос боротокуолга киирбит. Итинтэн кулууп тутуутун бырайыага оҥоһуллубут, эспэртиисэни бастакы кварталга ааһыахтара. Онтон инвест-бырагыраамаҕа киириитэ чопчуланыа.

Аллараа түөлбэҕэ 30 тахса ыал дьиэтэ сылааска холбонуоҕа. Эдэр исписэлиистэри дьиэнэн хааччыйыыга улуус баһылыгын дьаһалынан Майаттан саҕалаан бу боппуруоһу быһаарыахтара. Ол курдук, Майаҕа 12 кыбартыыралаах дьиэттэн аҕыһын эдэр исписэлиистэргэ былааннаабыттар.

Төхтүргэ гаастааһын боппуруоһугар тохтоотоххо, манна Аллараа Бэстээхтэн тардыллыан сөп диэн исписэлиистэр аахпыттар. Онон сибээстээн гаһы тарҕатар ыстаансыйа кыамтата улаатара ирдэнэр.

Никита Шарин сэбиэскэй саҕанааҕы дьиэлэри көтүрүүгэ олохтоох бүддьүөккэ үп көрөллөрө буоллар, эдэр ыалларга дьиэ тутталларыгар сир тахсыа этэ диир.

Л.Санникова ууну ыраастыыр ыстаансыйалары нэһилиэктэргэ туруоруохха диэн сөптөөх этиини киллэрдэ.

«Уйгу» түөлбэ олохтоохторо маһынан оттунан олороллор эбит. Ону үксэ биэнсийэлэээхтэр, инбэлииттэр буолан мас мастыыр кытааппыт. Онон 2022 с. Я.А.Новиков ититии ситимин киллэриэм диэн эрэннэрбит. Бастаан 45 ыал сайаапкалаан баран харчылара кыаллыбакка, 18 ыал киллэттэрэргэ сөбүлэммит. Онон 158 000 солк. кыттыспыттар. Улуус эмиэ көмөлөһүөм диэн эрэннэрбит. Ол эрээри өрөспүүбүлүкэттэн туох көмө баар буолуон сөбүн Анна Винокурова ыйытта. Онон бу боппуруос боротокуолга киириэ диэтилэр.

Н.Шарин магистральнай турбанан гаас кэлэрин кэтэһэрин этэн туран, быйылгы ыытыллыбыт отчуоттан астынным, чыҥха атын кэпсэтии буолла диэн сыаналаата.