Бүгүн туолбут ый тэтэркэй өҥнөнөр дуо?

Муус устар 6 күнүгэр ый туолар. Халлааҥҥа Хой сулус бөлөҕүттэн Ыйааһын үргэл сулуска тиийэр. Бу ый туолуутун кэнниттэн православнай итэҕэллээх дьоҥҥо Пасха бырааһынньыга саҕаланар. Быйыл Пасха иннинээҕи ый туолуутун сааскы сибэккилэргэ тэҥнээн, тэтэркэй өҥнөөх диэн ааттаатылар. Ол эрээри, халлааҥҥа баар ыйбыт өҥүн уларыппат.

Ый муҥутаан туолуута муус устар 6 күнүгэр күнүс 1 аҥаар чааска буолла. Бу кэнниттэн муус устар 8 күнүгэр диэри туолан турар, онтон сыыйа эмтэрийэн барар. Ый кэрбэнэр кэмигэр ыраастаныы, куһаҕантан босхолонуу ордук тоҕоостоох.

Ый байҕал уутун тардар эрэ буолбакка, Сиргэ баар тыынар тыыннаахха барытыгар дьайар. Доруобуйаны көрүнэ, санааны сааһылыы сылдьыахха наада. Бу кэмҥэ киһиэхэ олоҕу саҥаттан саҕалыыр, уларытар кыах бэриллэр. Саҥа идиэйэни, бырайыагы олоххо киллэрэргэ табыгастаах кэм.