Бырабыыталыстыба отчуота Үөһээ Бүлүү улууһугар саҕаланна

Саха Өрөспүүбүлүкэтин Бырабыыталыстыбатын 2023 сыллаах үлэтин отчуоттара бары улуустарга ыытыллара, үгэс буолла.

Өрөспүүбүлүкэ ситэриилээх былааһын, министиэристибэлэрин уонна биэдэмистибэлэрин бэрэстэбиитэллэрэ ааспыт сыллааҕы үлэлэрин отчуотун, бүгүн, олунньу 5 күнүттэн, Үөһээ Бүлүү улууһуттан саҕалаатылар. Отчуоттуур бөлөх Үөһээ Бүлүү улууһун дьаһалтатыгар тэрээһин мунньаҕы ыытта.

Тырааныспар уонна суол тутуутун миниистирэ салайааччылаах бырабыыталыстыба бөлөҕө Үөһээ Бүлүү улууһун дьаһалтатын кытары көрүстэ уонна отчуот үлэтин торумнаата.
Бүгүҥҥүттэн ситэриилээх былаас уорганын бэрэстэбиитэллэрэ үс бөлөххө арахсан нэһилиэктэринэн үлэлиэхтэрэ.
Оробуочай бөлөхтөр хас нэһилиэк аайы отчуот кэнниттэн биирдиилээн дьону кытары көрсүөхтэрэ, тус ыйытыыларга хоруйдуохтара.
Онтон олунньу 7 күнүгэр нэһилиэктэри кытары көрсүһүү түмүгүн таһаарар отчуоту улуус киинигэр уонна Үөдүгэй нэһилиэгэр холбоон оҥоруохтара.