Чурапчы улууһун Мындаҕаайы сэлиэнньэтигэр саҥа оскуола аһылынна

Саха сиригэр саҥа орто оскуола аһылынна – Чурапчы улууһун Мындаҕаайы сэлиэнньэтигэр. Оскуоланы Арассыыйа бэрэсидьиэнэ Владимир Путин сорудаҕынан үлэлиир “Комплексное развитие сельских территорий” судаарыстыбаннай бырагыраама иитинэн туттулар. Бу иннинэ оскуола саахалланар туруктаах 1970 сыллаах мас, эргэ дьиэҕэ үлэлии олорбута.

Оскуола аһыллыытын үөрүүлээх тэрээһинигэр, тохсунньу 30 күнүгэр, бэлиэ түгэнинэн үөрэнээччилэри уонна кэлэктииби Ил Дархан Айсен Николаев эҕэрдэлээтэ.

“Оскуола саҥа дьиэтэ киирэн уонна аныгы тэрилинэн хааччыллан, үөрэх өссө умсулҕаннаах буоларыгар уонна оҕолор сыраларын түмэн үөрэнэллэригэр, саҥа ситиһиилэргэ сирдииригэр эрэнэбин. Учууталлар манна үлэлииллэригэр даҕаны табыгастаах. Биллэн турар, бу сэлиэнньэ салгыы сайдарыгар төһүү күүс буолуоҕа”, — диэн Ил Дархан эттэ.

Саха сирэ инникитин силигилии сайдарын туһугар, үөрэх уонна үүнэр көлүөнэни иитии боппуруостарыгар  бүгүн өрөспүүбүлүкэ салалтата бигэ тирэҕи уурарын Айсен Николаев бэлиэтээтэ.

20530 кв. м  иэннээх, 120 миэстэлээх икки мэндиэмэннээх таас дьиэҕэ оҕолор сайдалларыгар бары усулуобуйа тэриллибит, хостору аныгы тэрилинэн хааччыйбыттар. Манна үөрэнэр кылаастар, аһыыр сир, успуорт уонна аактабай саалалар, бибилэтиэкэ, үлэ уруогар аналлаах мастарыскыай, мэдиссиинэ блога, таҥас уларыттар уонна куруһуоктары ыытар хостор бааллар.

“Биһиги оҕолорбутугар анаан усулуобуйа тэрийбиккитигэр педагогтар, төрөппүттэр уонна үөрэнээччилэр ааттарыттан махталбытын биллэрэбит. Оскуолабытын бүтэрээччилэр Саха сирэ, дойду сайдыытыгар бэйэлэрин кылааттарын киллэрэллэригэр эрэнэбин”, — диэн оскуола дириэктэрэ Виктория Пермякова эттэ.

Күн бүгүн оскуолаҕа 102 оҕо үөрэнэр, 30 учуутал үлэлиир.

“Биһиги мантан инньэ маннык улахан уонна кырасыабай оскуолаҕа үөрэнэрбититтэн олус үөрэбин! Бэйэбит успуорт саалаламмыппытыттан ордук үөрдүм”, — диэн 5-с кылаас үөрэнээччитэ Антон Игнатьев бэлиэтиир.

Санатан эттэххэ, кэлиҥҥи 5 сылга Саха сирин 33 тыһ. тахса үөрэнээччитэ үөрэх саҥа инфраструктуратынан хааччылынна. Аҥардас ааспыт сылга өрөспүүбүлүкэҕэ 6 уһуйаан уонна 14 оскуола үлэҕэ киирдэ, олор истэригэр эрэгийиэҥҥэ саамай улахан Дьокуускай куорат Прометей түөлбэтигэр оскуола уонна тыа сиригэр саамай улахан оскуола Горнай улууһун Бэрдьигэстээх сэлиэнньэтигэр. Быйыл 6 уһуйааны уонна 18 оскуоланы үлэҕэ киллэрэр былааннаахтар.

Ил Дархан уонна Бырабыыталыстыба пресс-сулууспата.