Чурапчыга национальнай многоборьеҕа өрөспүүбүлүкэ чөмпүйэнээтэ бастакытын ыытыллыаҕа

Кулун тутар 16-17 күннэригэр Чурапчыга национальнай многоборьеҕа өрөспүүбүлүкэтээҕи чөмпүйэнээт ыытыллыаҕа. Бу чөмпүйэнээт эрдэ наар Дьокуускайга буолар этэ. 

Быйылгы чөмпүйэнээт Чурапчытааҕы физкултуура уонна успуорт институтун баазатыгар буолуоҕа. Бу улууска ыытар туһунан национальнай многоборье федерациятын бэрэсидьиэнэ Алексей Пинигин көҕүлээбитин, улуус баһылыга Степан Саргыдаев өйөөбүт.

Чөмпүйэнээккэ уолаттар 70 киилэҕэ диэри уонна онтон үөһээ ыйааһыҥҥа арахсан күрэхтэһиэхтэрэ. Оттон «Дыгын оонньууларыгар» кыттар иһин путевканы 70 киилэттэн үөһээ ыйааһыннаах уолаттарга эрэ оонньотуохтара. «Чөмпүйүөн Куубагар» миэстэлэспит боотурдар чөмпүйэнээккэ кыттан эмиэ путевка ылар түгэннэригэр, кинилэртэн аллараа сылдьар элбэх очукуолаах уолаттар кыттар быраабы ылыахтара диэн Иван Белолюбскай СИА-ҕа иһитиннэрэр.

Кыайыылаахтар 50 тыһ. солк., 40 тыһ. солк. уонна 30 тыһ. солк. наҕараадаланыахтара. Итиэннэ Чурапчы улууһун дьаһалтата бириистэри туруоруоҕа.