Чурапчыга национальнай многоборьеҕа Саха сирин чөмпүйэнээтэ саҕаланар

Бүгүҥҥүттэн Чурапчы сэлиэнньэтигэр национальнай многоборьеҕа өрөспүүбүлүкэ чөмпүйэнээтэ саҕаланар. Саха сирин оройуоннарыттан 40 кыттааччы илин-кэлин түсүһүөҕэ. Бастыҥнар «Дыгын оонньууларын» финалыгар кыттар путевканан наҕараадаланыахтара.

Чөмпүйэнээккэ 70 киилэҕэ диэри уонна онтон үөһэ ыйааһыннаах эр дьон, итиэннэ ыйааһынынан хааччаҕа суох дьахталлар кыттыахтара.

Оттон «Дыгын оонньууларыгар» түөрт путевканы 70 киилэттэн үөһээ ыйааһыҥҥа кыттар эр дьоҥҥо оонньотуохтара. Манна 22 спортсмен сайаапкаласта. Олор истэригэр биллэр-көстөр многоборецтар бааллар: Николай Обоев (Ньурба), Николай Матаннанов (Таатта), Алексей Соколов (Сунтаар), Борис Сдвижков (Амма), Давыд Колесов (Хаҥалас), Павел Друзьянов (Чурапчы).