Дьахтары таптал уонна истиҥ эйгэ тупсарар

Кэрэ аҥаарга сүбэлэр

Тыйыс тымныылаах, куйаас сайыннаах Саха сирин кэрэ аҥаардара ханнык даҕаны усулуобуйаҕа бэйэлэрин көрүнэллэр, кырдьыбат туһугар туруулаһаллар.

Күн уотуттан харыстаныы

Ол эрээри үгүс киһи күн уотун дьайыыта кырдьыы сүрүн төрүөтэ буоларын билбэт. Ол курдук олунньуттан саҕа­лаан киһи сирэйин тириитигэр күн уотун дьайыыта күүһүрэн барар.  Саха дьонугар күн уота тиийбэтиттэн Д битэмиин өрүү тиийбэт диэн миэдиктэр бэлиэ­тииллэр. Ол эрээри сирэй тирии­тигэр биһиги кэмчитик тыгар күммүт уота, сааскы салгын атыннык дьайар. Ону сэргэ, кыһын -40-50 кыраадыс тымныы кэнниттэн эмискэ сылаас дьиэҕэ киирии сирэй тириитигэр өрүү куһаҕан дьа­­йыылаах буолар. Саас хал­­лаан сылыйыыта сирэй тириитэ дьыл кэмин уларыйыытыгар бэлэмэ суох, онон сорох кэрэ аҥаардар сирэйдэрин тирии­тэ хатыан, ымынахтаныан, сыаланыан-арыыланыан сөп. Кыһын сирэй тириитэ хатар уонна чарааһырар.  Ол иһин кыһын ордук сыалаах, тириини толорор, сымнатар кириэми тутталлар. Кыһыҥҥы өттүгэр сирэй тириитин туругун тупсарарга битэмииннэр уонна элбэх пептидтээх, коллагеннаах кириэмнэр өрүһүйэллэр. Оттон саас сирэй тириитэ дьыл кэмин уларыйыытыттан соһу­йуон сөп. Маны туоратар сыалтан нэдиэлэ ахсын сымнатар, битэмииннээх сирэй мааскалара эрэ өрүһүйэллэр. Сирэй тириитин күн уота кырытыннарар, бээтинэлэр үөскүөхтэрин сөп. Онон кэрэ аҥаардар сайын кэлэрин күүппэккэ, күнтэн харыстыыр дьайыылаах кириэминэн бистэн саҕалыахтаахтар. Маннык кириэм хас да көрүҥэ атыыланар. Биһиги килиимэппитигэр СПФ +50-тан кырата суох күнтэн харыстыыр дьайыылаах кириэми туттар ордук.

Кырыалаах кыһын саха дьахтарын сирэйин тириитигэр эрэ буолбакка, баттаҕар, тыҥыраҕар эмиэ дьайар. Түүлээх, халыҥ бэргэһэ иһигэр киһи куйахата тыыммат, тирии курдук кини эмиэ хатар, битэмииҥҥэ наадыйар. Сааһыран истэххэ, баттах уһуура мөлтүүр, түһэрэ элбиир.

Ханнык мааскалары оҥостуохха сөбүй?

Саас сирэй тириитин саҥардар, тупсарар туһуттан баанньыкка, саунаҕа сылдьан сымнатар ордук. Пилинг, скраб оҥостон нэдиэлэҕэ биирдэ ыраастанар олус туһалаах. Ньуоска аҥаара суоданы сирэй суунар мыылаҕытын (пенка) кытта булкуйан харах тулатын таарыйбакка эрэ ыраастанар ордук. Ити кэннэ тымныы уунан суунан баран сымнатар, битэмииннээх тирээпкэ эбэтэр альгинатнай боро­һуок маасканы уурунар туһа­лаах. Маны сэргэ, билигин атыыга бэлэм түүҥҥү кириэм курдук мааскалар хото атыыланаллар. Дьахтар 30 сааһын кэнниттэн нэдиэлэҕэ биирдэ-иккитэ мааскаланыахтаах, солуоҥҥа сылдьан сирэйин ыраастаппат буоллаҕына, дьиэ даҕаны усулуобуйатыгар бэйэни көрүнэрин умнуо суохтаах. Тоҕо диэтэххэ, 30 саас кэннэ дьахтар организма коллагены үөскэтэрэ аччыырын туһунан мэдиссиинэ үлэһиттэрэ бэлиэтииллэр

Аһары уойуу куттала

Саха дьахтара 40 сааһын ааста даҕаны, бэйэтэ да билбэтинэн, уойуон сөп. Бу ордук сааһыран баран оҕоломмут, аҕыйах хамсаныылаах, олорор үлэлээх дьахталларга дьайыыта улахан. Быраастар, фитнес-тириэньэрдэр сүбэлииллэринэн, дьахтар бу сааһыгар бурдук аһы сиирин аччатыахтаах. Ол эбэтэр элбэх оҕуруот аһын, фруктаны, эти, балыгы сиэхтээх. Уойуу дьахтар тас көрүҥүн эрэ буортулуур буолбатах. Бастатан туран, дьахтар сүрэҕин үлэтин мөлтөтөр. Сүһүөхтэрэ аһары улахан ыйааһыны ыарырҕатан дьахтар сиһэ, сүнньэ ыалдьыан сөп. Оттон тас көрүҥ туһунан эттэххэ, аһары уойбут дьахтар моҕохтонор, ортотунан уойар, кыраттан сылайар. Маннык көстүү ханнык да кэрэ аҥары сааһырдан көрдөрөр. Онон уойбат, кэмин инниттэн кырдьыбат туһуттан утуйар, аһыыр эрэсиими тутуһуу, элбэх ууну иһии улахан туһалаах. 40 сааһын ааспыт кэрэ аҥар C, Е, Д уонна В бөлөх битэмииннэрин рационугар киллэриэхтээх.

Баттаҕы көрүнүү кистэлэҥэ

Кырыалаах кыһын саха дьахтарын сирэйин тириитигэр эрэ буолбакка, баттаҕар, тыҥыраҕар эмиэ дьайар. Түүлээх, халыҥ бэргэһэ иһигэр киһи куйахата тыыммат, тирии курдук кини эмиэ хатар, битэмииҥҥэ наадыйар. Сааһыран истэххэ, баттах уһуура мөлтүүр, түһэрэ элбиир. Хаарыаннаах суһуохпутун хайдах өрүһүйэбит? Үгүс аныгы дьахтар батахтарын ботокс, спа-мааска нөҥүө солуоҥҥа тупсараллар. Ол эрээри бу баттахха быстах эрэ кэмҥэ дьайар. Оттон баттах мөлтөөһүнүн ис төрүөтэ куйахаҕа сытар. Билигин плазмолифтинг диэн өҥөнү хото туһанар буоллулар. Бу дьахтар тымырыттан ылыллыбыт хааны плазма оҥорон куйахаҕа укуоллууллар. Сылга иккитэ-үстэ манныкка сылдьар дьахтар баттаҕа хойуутук үүнэр, түһэрэ аччыыр, маҥхайбат.

Мүөт, кофе уонна ханньаах

Биир ост. ньуоска мүөтү, дьиҥнээх бытарытыллыбыт кофены уонна чайнай ньуос­ка ханньааҕы булкуйан төбө куйахатыгар биһиллэр.  Уонча мүнүүтэ салапаанынан бүрү­йэн баран сылдьыллар. Маннык маасканы нэдиэлэҕэ биирдэ оҥостор буоллахха, баттах маҥхайыыта аччыыр, хойдор уонна туруга тупсар.

Сыалаах баттахха – суорат

Ардыгар сорох дьахталлар баттахтара, халлаан сылый­даҕына, сыаланар-арыыланар. Маҕаһыын мааскатынаа­ҕар боростуой суорат мааска ардыгар туһата үгүс буолар. Суораты бистэн баран сала­паанынан баанан уонча мүнүүтэ сылдьыллар. Ити кэннэ сөрүүн уунан шампуннаан суунуллар.

Французстар этэллэринэн, кырасыабайа суох дьахтар диэн суох. Арай бэйэтин көрүммэт, сүрэҕэ суох дьахталлар баар буолуохтарын сөп. Хайаан даҕаны сыаналаах солуоҥҥа сылдьан тупсарынар диэн өйдөбүл тутах. Киһи санаата ыраас, үөрэ-көтө, олоҕу чэпчэкитик ылынар буоллаҕына, кини кырдьыбат.

Тускар туһан

30 саастаах дьахтар косметичката:

– Кириэм икки көрүҥэ

– Тонер

– Сыворотка

– Тушь

– Помада

– Духуу

– Мааска

– Пудра

40 саастаах дьахтар косметичката:

– Кириэм түөрт көрүҥэ

– Тонер

– Сыворотка

– Тушь, кыламаны уһатар арыы

– Помада, тэтэрдэр, кытардар косметика хас да көрүҥэ

– Духуу

– Мааска үс көрүҥэ (тирээпкэ, альгинатнай, түүҥҥү коллаген маскалар)

– Пудра

– Сирэй өҥүн тупсарар кириэм (ВВ кириэм)

Оттон 50 сааһын ааспыт дьахтар косметичкатыгар битэмиин элбэх буолуох­таах. Кини сирэ­йин уонна аһыыр аһын көрүнүүтэ тэҥ суолталаах буолар. Ол курдук кини биир бастакынан сирэйи суунуу, ыраастаныы уонна хатартан харыстыырга болҕомто ууруохтаах. Кириэм хас да көрүҥэ баар буолуох­таах. Күнүскү, түүҥҥү уонна өрөбүл күннэргэ туттуллар кириэм араастаһыахтаах.  Сирэйи ыраастаныы, сымнатыы уонна кириэмнэнии таһынан, бэйэ сааһыгар сөптөөх битэмиини, элбэх ууну иһии болҕомтоҕо ылыллыахтаах. Элбэхтэ сибиэһэй салгыҥҥа сылдьыы тыҥаҕа туһата улахан. Тыҥата доруобай киһи өрүү чэгиэн буолар. Дьахтар кэрэтик кырдьыахтаах диэн этии оруннаах. Кини сирэ­йин, доруобуйатын көрүнэрин таһынан, бэйэтигэр барсардык таҥныахтаах, ис туругун тупсарыныах­таах. Өйө-санаата киэҥ, мындыр уонна холку, ыраас эй­гэлээх буолуохтаах. Дьахтар ис эйгэтин таптал, истиҥ сыһыан эмиэ тупсарар.