Депутат кэриэһигэр өлгөм бириистэрдээх турнир

Бу ааспыт субуоталаах өрөбүлгэ “Триумф” спорткомплекска Ил Түмэн депутата, Өймөкөөнтөн төрүттээх-уустаах, “Строительнай” рынокка дириэктэринэн таһаарыылаахтык үлэлии сылдьыбыт, бэйэтин кэмигэр ССРС оҕолоругар иккис миэстэ буола сылдьыбыт, көҥүл тустууга ССРС спордун маастара Александр Крылов кэриэһигэр Бүтүн Россиятааҕы 1-кы турнира түмүктэннэ.

Маастар нуормалаах турнирга дойду 12 регионнарыттан 126 бөҕөстөр күөн көрүстүлэр. Турниры Александр Крылов үөлээннээхтэрэ, биир дойдулаахтара тэрийдилэр. Турнирга Саха Өрөспүүбүлүкэтин Баһылыгын солбуйааччы Дмитрий Садовников, өрөспүүбүлүкэ спорка миниистирэ Леонид Спиридонов, “Столичнай” рынок салайааччыта, көҥүл тустууга норуоттар икки ардыларынааҕы кылаастаах спорт маастара Афанасий Заболоцкай, Николай Адушинов, Алексей Филиппов, Анатолий Андреев уо.д.а. биир кылааска үөрэммит, бииргэ эрчиллибит доҕотторо, Александр Крылов дьиэ-кэргэнэ, ийэтэ Саргылаана Семеновна кыттыыны ыллылар.

Турнир биир сүрүн тэрийээччитэ, икки мөлүйүөнүнэн көмөлөспүт, Өймөкөөн улууһун баһылыга Иннокентий Семенович Сивцев патриоттуу өйдөөх-санаалаах Александр Владимирович Крылов Өймөкөөн, Муома, Халыма, Томпо улуустарын депутатын быһыытынан элбэх үлэни ыыппытын, дьоҥҥо-сэргэҕэ көмөлөспүтүн, пандемия туран, үс сыл буолан баран, маастар нуормалаах Бүтүн Россиятааҕы таһымнаах турнир аан бастаан ыытыллыытын ситиспиттэрин, оройуон уон ыйааһын кыайыылаахтарыгар 70 000 солк., бириистээх миэстэлэргэ тиксибиттэргэ 50 000, 30 000 солк. харчынан бириистэри олохтообуттарын, “Майтоналары” салайар бырааттыы Ушницкайдар 1 000 000 уу-харчынан көмөлөспүттэрин, мантан ыла сылын ахсын ыытыллыахтааҕын, Александр Крыловынан киэн тутталларын эттэ.
Александр Крылов оҕо эрдэҕинэ тустууга уһуйбут тренерэ, ийэтинэн аймаҕа, Саха Өрөспүүбүлүкэтин үтүөлээх тренерэ, оҕолорго өрөспүүбүлүкэ оҕолорун сүрүн тренерэ Прокопий Семенович Иванов бэйэтин иитиллээччитин туһунан кэпсииригэр, оҕо эрдэҕиттэн Шурик диэн таптаан ааттыылларын, уолаттарга тахсыылаахтык тустубутун, Россия үөрэнээччилэрин Спартакиадатыгар 74 кг иккис миэстэлэммитин, “цепкайын”, туппутун ыыппатын, утарсааччыларын мостикка түһэрдэҕинэ ыраастык хотуталыырын, “Столичнай” рыногы тэрийиэҕиттэн, Дьокуускай куорат тустууга федерациятын солбуллубат вице-президенинэн үлэлээбитин, тустуук оҕолору соҕуруу күрэхтэһиилэргэ кэлэллэригэр-баралларыгар үбүнэн-харчынан көмөлөспүтүн, турнир Россия күрэхтэһиилэрин календарнай былааныгар киллэриллибитин, турнир спонсордар көмөлөрүнэн ыытыллыбытын, тустууктар түмсүүлээхтэрин, хардарыта көмөлөсүһэллэрин бэлиэтээтэ.

Икки күннээх хапсыһыыларга 57 кг Алексей Копылов (Саха сирэ), 61 кг Алексей Чебодаев (Красноярскай), 65 кг Усман Шахгириев (Красноярскай), 70 кг Сайын Казырык (Тыва), 79 кг Дмитрий Зайнидинов (Красноярскай), 86 кг Азрет Улимбашев (Красноярскай), 92 кг Аюр Нимаев (Бурятия), 97 кг Максим Толмачев (Красноярскай-Саха сирэ), саамай ыарахан 125 кг ыйааһыннаахтарга Никита Хабаров (Саха сирэ) турнир кыайыылаахтарынан буоллулар.
Турнир күүтүллүбүт уонна бүтэһик хапсыһыытынан 74 кг ыйааһыннаахтарга буолла. Көбүөргэ Россия икки күүстээх бөҕөстөрө раҕыстылар. Бурятияттан аан дойду призера, Россия үс төгүллээх үрүө көмүс, боруонса призера, Иван Ярыгин икки төгүллээх призера, норуоттар икки ардыларынааҕы кылаастаах спорта маастара Евгений Жербаев уонна Европа чөмпүйүөнэ, Россия икки төгүллээх чөмпүйүөнэ, “Иван Ярыгин” турнирын икки төгүллээх кыайыылааҕа, норуоттар икки ардыларынааҕы кылаастаах спорт маастара Чечня Республикатыттан Исраил Касумов утарыта таҕыстылар. Күөн көрсүһүү реванш быһыытынан принципиальнай суолталаах. Хайаларыгар да эппиэтинэс улахан. Бу иининэ Исраил Касумов наар кыайа-хото сылдьыбыта. Бэрт сытыы, тыҥааһыннаах киирсии 13:1 ахсаанынан Евгений Жербаев ыраас техническай кыайыытынан түмүктэннэ.

Бастаабыттар 70 000 солк., иккис-үһүс миэстэлэргэ тиксибиттэр, туһааннааҕынан, 50 000 уонна 30 000 солк. биһирэннилэр. Кыайыылаахтар тренердэрэ 20 000 солк. бириэмийэлэннилэр. Болҕомтону сэрэбиэйи оонньотуу ылла. Кыһыл көмүс медалистар 1 000 000 солк. сүрүн бириис хаһаайынынан буолар туһугар сэрэбиэй тартылар, онуоха, 79 кг бастаабыт Красноярскай бөҕөһүгэр Дмитрий Зайнидиновка дьоллоох, дьоро түгэн тосхойдо.
Турниры сүрүн үбүлээччилэринэн Саха Өрөспүүбүлүкэтин спортивнай тустууга федерацията (Ил Дархан Николаев А.С.), “Саханефтегазсбыт” (ген.дир. Лебедев В.Н.), Өймөкөөн улууһа (Сивцев И.С.), “Столичнай” рынок (ген. Дир.Ланилов И.И.), “Майтона” Айти-хампаанньа (бырааттыы Ушницкайдар) буоллулар, Нөмүгү килиэп оҥорор оҥорор собуота (Нестеров В.А.) барыта 4 мөл. солк. көмөлөстүлэр. Улахан өйөбүл!

            Баһылай Посельскай,

Дьокуускай.

Хаартыскалар ааптар тиксэриилэрэ