Дьокуускайга «ититиигэ» хаттаан ааҕыыны оҥордулар

Бэҕэһээ ыйдааҕы хомунаалынай өҥөбүн төлөөрү ДЭК хонтуоратыгар тиийбиппэр кассир ититиигэ, ол эбэтэр сылааһынан хааччыйыыга хаттаан ааҕыы оҥорбуттар, салайар хампаанньаҕыттан ыйыт диэтэ.

“Трансстрой “ салайар хампаанньаттан бүгүн эрийэн туоһуласпыппар ааспыт 2023 сыллааҕы бу өҥөҕө төлөөбүккэр хаттаан ааҕыы оҥордубут, онон эйиэхэ кэлэр ыйгар абаансалааххын диэн үөртэ.

Онон бу өҥө иһин бэйэҕит хампааньаҕыт хаттаан ааҕыыны оҥорбутун дуу, суоҕун туһунан чопчулаһыҥ.

Таарыйа аҕыннахха, “Трансстрой” салайар хампаанньа Дьокуускайга көрөр-истэр дьиэлэригэр үтүө суобастаахтык сыһыаннаһар, манна саас эрдэ тиэргэн хаарын барытын ыраастаан тиэйэллэр, дьиэ таһын хомуйааччы туох да омуна суох эттэххэ, биэдэрэлээх сылдьан бытархай сыыһы, кумааҕыны барытын хомуйа сылдьар буолар. Кылаабынай инженердэрэ сарсыарда 7 чаастан кэлэн хайы-үйэ сантехниктарын дьаһайа сылдьааччы.