Дьокуускайга Матвей Мучины тиһэх суолугар атаардылар

Алтынньы 30 күнүгэр Дьокуускай куоракка Саха Өрөспүүбүлүкэтин судаарыстыбаннай уонна уопсастыбаннай диэйэтэлэ, педагогика билимин хандьыдаата, өрөспүүбүлүкэ норуотун хаһаайыстыбатын үтүөлээх үлэһитэ Матвей Васильевич Мучины тиһэх суолугар атаарыы буолан ааста. Саха чулуу уола  алтынньы 27 күнүгэр 86 сааһыгар күн сириттэн барбыта.

Кутурҕаннаах тэрээһиҥҥэ судаарыстыбаннай былаас уорганнарын, билим уонна үөрэх эйгэтин бэрэстэбиитэллэрэ, бииргэ үлэлээбит дьоно, доҕотторо, аймахтара уонна чугас дьоно кытыннылар.

Саха сирин Ил Дархана Айсен Николаев Матвей Васильевич кэргэнигэр Елена Дмитриевнаҕа, кини аймахтарыгар уонна чугас дьонугар дириҥ кутурҕанын биллэрдэ.

«Өрөспүүбүлүкэ маҥнайгы Бэрэсидьиэнэ Михаил Ефимович Николаев чугас соратнига, судаарыстыбаннас сайдыытыгар, үөрэҕирии тиһигин үүнүүтүгэр уонна идэтийбит каадырдары бэлэмнээһиҥҥэ үгүс сылларын анаабыт чулуу киһибит олохтон туораата. Матвей Васильевич — айылҕаттан айыллыбыт педагог, өрөспүүбүлүкэ интеллектуальнай уонна каадыр өттүнэн кыаҕа улаатарыгар сүдү кылааты киллэрбитэ. Кини олоҕун суола — төрөөбүт Сахатын сиригэр бэриниилээхтик сулууспалааһын, өрөспүүбүлүкэ инникитин туһугар үрдүк эппиэтинэс уонна дьоҥҥо-сэргэҕэ ис сүрэхтэн кыһамньы чаҕылхай холобура буолар», — диэн Ил Дархан эттэ.

Саха Өрөспүүбүлүкэтин Бырабыыталыстыбатын аатыттан үп миниистирин эбээһинэһин толорооччу Иван Алексеев тыл эттэ. Ону тэҥэ Ил Түмэн, муниципальнай тэриллиилэр, научнай тэрилтэлэр, үөрэх кыһаларын уонна уопсастыбаннас бэрэстэбиитэллэрэ санааларын үллэһиннилэр.

Биир дойдулаахтарын аатыттан Мэҥэ Хаҥалас улууһун баһылыга Дмитрий Тихонов кутурҕанын биллэрдэ. Оттон Матвей Васильевич өрөспүүбүлүкэ сайдыытыгар киллэрбит кылаатын бэлиэтээн, Амма улууһун баһылыга Сергей Кузьмин тэлэгэрээмэтэ ааҕылынна:

«Биһиги, аммалар, кини элбэх өрүттээх таһаарыылаах үлэтин, бэйэтин дьыалатыгар бэриниилээҕин, өрөспүүбүлүкэ социальнай-экэнэмиичэскэй сайдыытыгар уонна каадыр кыаҕын бөҕөргөтүүгэ киллэрбит сүдү кылаатын үрдүктүк сыаналыыбыт. Матвей Васильевич Арассыыйаҕа уонна тас дойдуларга үрдүк үөрэх кыһаларыгар каадырдары сыаллаах-соруктаах  бэлэмнээһин бүтүн тиһигин тэрийбитэ. Тыһыынчанан эдэр саха ыччатыгар, ол иһигэр Амма ыччатыгар, киэҥ олоххо ааны арыйбыта, дойду бастыҥ үөрэҕин ылалларыгар, наадалаах исписэлиис буолалларыгар уонна олоххо бэйэлэрин суолларын булалларыгар кыах биэрбитэ».

Үөрэх уонна билим министиэристибэтин аатыттан миниистир бастакы солбуйааччыта Виктория Захарова Матвей Васильевич өрөспүүбүлүкэ үөрэҕин тиһигэ сайдарыгар оҥорбут сүдү үлэтин суолтатын бэлиэтээтэ.

Атаарыы кэмигэр кини төрөөбүт өрөспүүбүлүкэтигэр бэриниилээҕин, идэҕэ үрдүк таһымын уонна дьоҥҥо болҕомтолооҕун иһин махтал тыллара этилиннилэр. Панихида кыттыылаахтара Матвей Васильевиһы биир мүнүүтэ чуумпуруунан ахтан аастылар, онтон кинини кытта быраһаайдаһыы буолла.

Матвей Васильевич Мучин сырдык аата кини бииргэ үлэлээбит дьонун, үөрэнээччилэрин, доҕотторун уонна кинини билэр бары дьон сүрэхтэригэр өрүү тыыннаах буолуоҕа.

Салгыы тиһэх суолугар атаарыы уонна көмүү тэрээһиннэрэ:

• Алтынньы 30 күнэ (бүгүн): Матвей Васильевиһы биир дойдулаахтара атаарыахтара. Панихида Мэҥэ Хаҥалас улууһун Аллараа Бэстээх бөһүөлэгэр Тырааныспар тиэхиньикумугар (Ленин уул. 40/1) 16:30 чааска буолуоҕа.
• Алтынньы 31 күнэ (сарсын): Матвей Мучины төрөөбүт дойдутугар — Мэҥэ Хаҥалас улууһун Сыымах сэлиэнньэтигэр көмүөхтэрэ. Сыымахха быраһаайдаһыы сарсыарда 10:00 чааска Элбэх хайысхалаах култуура киинигэр (Сыымах, Герой Попов уул. 37) буолан ааһыаҕа.