Хаҥалас улууһугар байыаннай дьайыы кыттыылаахтарын дьиэ кэргэттэригэр аналлаах тэрээһиннэр

Хаҥалас оройуонугар социальнай координатордар көҕүлээһиннэринэн оройуон дьаһалтатын өйөбүлүнэн «Сарын-сарынтан өйөһөн» бырайыагы олоххо киллэрии салҕанар.

Бу сырыыга көһө сылдьар бөлөх Хаҥалас улууһун Өктөм нэһилиэгэр үлэлээтэ. Үтүө үгэскэ кубулуйбут көрсүһүү анал байыаннай дьайыы кыттыылаахтарын аймахтарын, чугас дьонун түмтэ. Көрсүһүү сүрүн сыала-соруга – дьиэ кэргэттэр сөптөөх иһитиннэриини, көмөнү эрэ ылбакка, уйулҕа өттүнэн холкутуйалларыгар уонна айар үлэнэн дьарыгы тэрийии.

Тэрээһиҥҥэ «Аҕа дойдуну көмүкээччилэр» пуонда филиалын социальнай координатордара Екатерина Перевалова уонна Александр Пермяков сүбэ-ама биэрдилэр. Дьиэ кэргэн социальнай өйөбүлүн дьаһалларын, төлөбүрү ылыы бэрээдэгин уонна юридическай көмөнү ылыы туһунан толору иһитиннэрии оҥордулар. Биирдиилээн кэпсэтиилэр кыһалҕалаахтар олохторугар сыһыаннаах чопчу ыйытыыларга хоруйдары ыларга кыаҕы биэрдэ. Оттон өлбүт буойуттар дьиэ кэргэттэрэ, бастатан туран, үйэтитии боппуруостарыгар санааларын эттилэр.

Хаҥалас оройуонун Нэһилиэнньэ социальнай көмүскэлин управлениетын исписэлииһэ Кэрэчээнэ Борисова киэргэл-харысхал оҥорууга маастар-кылаас ыытта. Кини салалтатынан тэрээһин кыттыылаахтара испиниэк-ымыы оҥорбуттар, онно хас биирдии киһи дууһатын сылааһын иҥэрбит. Бу дьарык өрө сүргэни көтөхтө, күннээҕи кыһалҕаттан аралдьыйарга уонна бэйэлэрин илиилэринэн киэргэл оҥорорго көмөлөстө.

Көрсүһүүнү түмүгүнэн тэрийээччилэр «Сарын-сарынтан өйөһөн» бырайыак наадалааҕын, онон салҕанан барыахтааҕын бэлиэтээтилэр. Маннык тэрээһиннэр анал байыаннай дьайыы кыттыылаахтарын хас биирдии дьиэ кэргэнигэр тустаах сыһыаны хааччыйарга, үөскүүр ыйыталарга суһаллык хорудуурга уонна наадалаах социальнай, быраап уонна психологическай көмөнү оҥорорго кыаҕы биэрэр.